ORANJESTAD (AAN): Despues di un vacacion escolar largo IBiSA ta bay cuminsa cu su actividadnan di Deporte Escolar y Hoben Activo Hoben Feliz.
Deporte Escolar ta duna tur scol y studiante e oportunidad di competi den un deporte di ekipo como tambe deporte individual. IBiSA su calendario deportivo ta cana paralelo cu esun escolar.
E prome competencia ta di trefbal y ta solamente pa scol basico y e ta tuma lugar den e siguiente distritonan: San Nicolas, Santa Cruz, Noord y Playa. Despues di competencia pa districto IBiSA ta bay organisa e final unda cada scol ganador den su distrito ta topa otro pa saca e ganador absoluto.
Inscripcion ta tuma lugar solamente via scol y e categoria ta A cu ta (2011 – 2013) y e ta tuma lugar dia 25 – 29 di october, categoria B ta (2008 – 2010) y e ta tuma lugar 18 – 22 di october e competencia ta pa mucha muhe. Pa mas informacion di e calendario deportivo escolar por bay riba IBiSA su pagina di Facebook unda ta haya un link y ta dirigi bo na e google file cu tur detaye.
Hoben Activo Hoben Feliz ta un proyecto unda e hobennan di e edad di 8 pa 13 aña ta bin siña un deporte nobo cu trainer di un federacion of di un club den un forma dushi y saludabel; e programa ta dialuna y diaranzon for di 15:30 pa 17:00 den e distritonan di San Nicolas cu e deporte di Judo, Santa Cruz cu e deporte di Atletismo y na Noord cu e deporte di Capoeira. E fechanan cu nan ta bay tuma lugar ta 20, 22, 27 y 29 di september y e inscripcion ta totalmente gratis.
Por haya e link riba IBiSA su pagina di Facebook of por mail This email address is being protected from spambots. You need JavaScript enabled to view it. pa mas informacion si ta necesario.
