ORANJESTAD (AAN): Den e ultimo siman cu a pasa e hoben futbolista arubiano, Ethan Tromp,
a regresa for di Merca unda el a bay haci try-out cu e ekipo di futbol (soccer) colegial di Life University y ademas tambe a haya e oportunidad pa train cu e ekipo U19 - futuro promesanan di Atlanta United FC di MLS, esaki a tuma lugar na Marietta, Georgia den cercania di e ciudad di Atlanta.
E relato aki suministra pa Alvaro Velasquez Theysen, ta pa comparti con un hoben cu aspiracion por cana riba e caminda di progreso y logra su metanan, tambe con e rol di un facilitador y mentor por yuda.
Ethan di 21 aña ta conoci den e mundo di futbol local unda e ta militando actualmente den e club di SV Britannia den Division Honor, e ta fungi den e rol di medio-campista (bolante), recientemente Ethan cu su club di e pumanan a logra gana Copa Betico Croes 2023.
Su carera futbolistico a cuminsa cu e club di SC Bubali den e nivel nan hubenil y algun anja atras a hay'e ta hunga cu su club di infancia den Division Honor tambe.
Ethan a yega di representa Aruba den e seleccion nacional y a yega di biaha den exterior pa weganan internacional.
E persona cu a facilita e try-out aki na Merca ta Martin Koopman, un persona di hopi conocimiento di e deporte y cu hopi contact cu hendenan den e profesion di futbol rond mundo. Martin, un Hulandes, ex hungador profesional di futbol den su tempo pa entre otro Go Ahead Eagles y FC Twente den Eredivisie di Hulanda,
e tabata tambe bondscoach di Aruba for di 2018 pa 2020, y recientemente a maneha e ekipo nacional di Maldives cu basta exito den AFC (Asian Football Confederation).
E experiencia y "netwerk" di Martin Koopman ta importante pa yuda y facilita futbolistanan hoben local cu tin deseo y "drive", pa mehora nan futbol den
exterior, cu chens pa hunga na un diferente nivel, mas competitivo y unda nan por tin mihor oportunidad pa sinja mas y progresa den nan carera y ken sa, hasta hunga n'un nivel profesional un dia.
Martin ta un persona cu sa con pa haci e contact nan, duna conseho, p'asina e talento hoben tin un chens. Martin a yega di facilita un try out caba pa Ethan cu e club FC Twente na 2018, na nivel hubenil. Ethan a hasta worde invita pa bay Hulanda y sigui cu su desaroyo como hungador cu e ekipo di Enschede.
Biniendo back na 2023, e prome dia di try-out na Georgia a tuma lugar Dialuna 3 di April n'e campus di Life University, un school na nivel universitario di cuater aña, Ethan a permanece eynan te cu e Diabierna siguiente, entrenando ful un siman y a hasta haya un gran oportunidad pa train cu Atlanta United FC U-19 riba Diaranson.
Un siman hopi bezig pa Ethan cu training nan diario, p'asina worde evalua pa yega na remarca pa kizas join e ekipo di futbol di Life University mes, pero de p'aso
den futuro tambe c'un chens pa bin na mirada di e club local of otro clubnan di MLS mes, y ken sa cu por tin un futuro eynan tambe un dia, tur cos por pasa ora bo por haya un oportunidad pa exhibi lok'e bo tin den un pais man'e Merca.
{gallery}Ethan Tromp,{/gallery}
Martin ta remarka un biaha mas cu nos mester wak e talento den e hoben nan, "pero esey ta solamente e comienso", tin diferente sorto di talento tambe, e hungador mes hopi biaha mester sinja reconoce su mesun talentonan, tin biaha cu ayudo di otronan tambe, man'e su mesun "kring" di famia.
Tin situacion nan unda e hungador na prome bista kizas no ta resalta di biaha, pero tin e aspectonan di su wega indicando con e por aporta un cierto "strength" den un 'dinamico di ekipo' y na mesun tempo por mehora su wega personal den e otro aspectonan unda e tin cierto debilidad nan.
Un ekipo semper tin mester di diferente talento y calidad, e hungadornan den un oncena tin diferente rolnan. Na un manera di bisa, mester 'cultiva' e hungador, cu tempo, enfatisando su bon talentonan y mehorando su fayonan (oportunidad nan), tin un trabao pa haci p'esey, dependiendo tambe cuanto 'hamber' e hungador mes tin pa yega na exito. "Talento so no ta suficiente pa desaroya" segun Martin.
Ta un proceso bo ta cuminsa, tin biaha for di un chens chikito mes, despues mester sigui traha cu e hungador. Otro cos cu ta importante ta cu mester tin un estado mental (mind-set) fuerte cu bon caracter y hopi deseo pa logra, pero, no ta di biaha cos ta sosode, mester traha p'e semper.
E famia tambe ta integral pa cuminsa e 'proceso di progreso' aki, nan tambe mester e "mind-set" apropia pa sostene e hoben.
Martin a papia hopi di cu mester di un "begeleiding" p'e hoben atletanan, mester acesora e hoben nan constantemente, na un bon manera, wak nan training nan, hasta den secreto y duna remarka, y esey ta inclui e mesun famianan tambe.
Ethan na su turno a conta nos cu e try-out a bay bon, den facilidadnan hopi bunita mes riba e campus di Life University.
Training nan tabata cuminsa trempan mainta, pa 7am caba, tin biaha den frieu. E nivel fisico di e atletanan di Life University cu Ethan a train cu n'e tabata hopi halto (mas cu di nos mes), apesar cu tabata den su mayoria e elenco di e reserve team.
Durante e training nan Ethan a hay'e ta husa un sensor (chip) rond di su enkel pa midi velocidad, distancia cori, cuanto biaha bo ta toca e bala, con duro bo ta pasa e bala, etc. Pa dia cu Ethan a haya e oportunidad pa train cu e ekipo U19 di Atlanta United, el a realisa cu nan tambe tin un nivel hopi halto cu bon condicion fisico y "ball-handling", cu hopi velocidad.
Un dia Ethan a hasta haya un chens pa wak e training di e ekipo mayor (profesional) di Atlanta United FC, incluyendo e hungador hoben Argentino, Thiago Almada, cu a caba di sali campeon di mundo cu e seleccion di Argentina na Qatar 2022 hunto cu Lionel Messi. Thiago ta e prome hungador militando den un club di MLS na Merca cu a yega na sali campeon mundial cu su seleccion nacional.
"M'a keda hopi satisfecho cu e oportunidad y e desempeño na Georgia" segun Ethan, apesar di e retonan grandi cu un try-out por trece cu n'e, e tempo cu Ethan a yega di pasa anteriormente na Hulanda cu FC Twente lo a yuda hopi. Man'e Martin mes a menciona tambe, tur experiencia ta conta, no tin experiencia malo per se, tur ta hacibo mas fuerte y mihor prepara p'e siguiente.
E experiencia aki di Ethan Tromp, yuda pa Martin Koopman, no ta pa su mes so, e ta algo pa comparti, unda cu otro famianan por siña di dje tambe, con pa yuda nan mesun yiunan riba un caminda pa haya chens pa logra nan metanan, reconociendo e talento di e hoben, fomentando un bon caracter, p'e ta "willing" pa sinja y mehora, unda cu e famia mes ta hopi importante tambe pa yud'e riba e caminda pa su futuro. Ethan ta hopi agradecido tambe na Arubaanse Voetbal Bond.
