Competencia na Argentina
ORANJESTAD (AAN): E siman aki, e “Chef de Mission” di “Weganan Suramericano Santa Fe 2026” a sali rumbo pa Argentina pa asina atende e reunionnan di Hefe di mision, pa asina cera conoci cu e comision organizador di e Weganan Suramericano, ademas di haya tur informacion importante pa Team Aruba su participacion na e Weganan den luna di September venidero.
Hefe di mision pa e Weganan aki lo ta Mildred Wever, cu sigur ta bon conoci dentro di e mundo di deporte na Aruba. Mildred lo forma parti di un delegacion di Comite Olimpico Arubano (COA) pa prome biaha, pero ta conta cu su experiencia y liderazgo como un dirigente deportivo cu pa hopi aña a aporta na deporte na Aruba.
Hunto cu Mildred a bay e Directora Tecnico di COA, Monica Fajardo. Monica ta encarga cu e parti tecnico di e delegacionnan cu ta representa TEAMARU y lo bay pa asina ricibi tur information relevante y importante, ademas di conta cu hopi experiencia di participacion na Weganan di varios Ciclo Olimpico. Como ekipo cu ta representa TEAMARU na e reunionnan aki, nan lo percura pa tur preparacion pa Aruba su participacion na e Weganan Suramericano Santa Fe 2026.
