ORANJESTAD (AAN): Recientemente, fundador y head-coach di Giants Aquatics Aruba, señor Jordy Groters,
a firma un contract cu e marca renombra TYR sport y asina Giants Aquatics Aruba ta bira un TYR team.
Esaki ta prome biaha den e mundo di natacion na Aruba, cu un marca internacional ta asocia su mes cu un team local, haciendo e di dos TYR team di natacion den Caribe. Cu esaki, Giants Aquatics Aruba su landadonan, e coachnan y e team completo ta goza di privilegionan special y lo carga e marca durante competencianan grandi nacional y internacional.
Cu e gran logro aki, ta keda proba cu Giants Aquatics Aruba, cu apenas tres aña di existencia y contando cu 56 landado competitivo y mas cu 30 master swimmers, ta avansando rapidamente, cumpliendo cu e vision di crea oportunidad pa landadonan di Aruba y ta un team di natacion innovativo.
