ORANJESTAD (AAN): Siman pasa, un cadena di oracion a ser haci na Aruba pasobra e informe a drenta cu un futbolista local, a bira hopi malo.
Ora cu a detecta cancer luna pasa, famianan no a perde tempo, y riba nan mes a busca forma pa hiba Jaisley Boekhoudt rumbo pa Republica Dominicana, pa e cuminza haya tratamento rapido.
Famianan a core cuminza recauda fondo, y hasta un pagina a wordo crea riba GoFundMe.com pa purba yega na 2.000 Euro pa cubri e gastonan aki.
Ya caba mey-mey di luna di Augustus el a yega Republica Dominicana y aki mesora a cuminza cu su tratamento. E tabata den bon animo y perspectivanan tabata mustra bon, y e tabata hasta manda mensahe pa su famia, fanaticonan, y amigonan cu a duna un man.
“Hopi love pa boso, masha danki pa e yudanza di curazon. Dios bendiciona boso” tabata un di su mensahenan cu a wordo manda pa su fanaticonan.
Jaisley Boekhoudt ta un hoben kende for di tempo di scol a mustra un agilidad enorme pa wega di futbol. Rapidamente el a wordo mira como un delantero cu tin stamina di comienzo te fin, y tabata faborito di coachnan. E tabata realmente un futbolista hopi stima pa tur team di scol, y pa futbol na Aruba cu el a hunga aden.
Ademas di esey, e ta canta y ta un rapper cu ta produci cancionnan cu ta refleha e bida duro, y tambe su amor pa e isla di Aruba.
Jaisley Boekhoudt a nace dia 13 di November 1987, pues tin solamente 35 aña di edad.
Diasabra atardi e informe tristo a drenta, cu Jaisley a perde bataya contra cancer y el a fayece na Santo Domingo.
Na famianan, amigo, y fanaticonan di dje, DIARIO ta extende su mas profundo palabra di condolencia.
Potret ta cortesia di 297Sports Aruba.
