Campeonato Himno y Bandera AUA Jrs
ORANJESTAD (AAN): E Campeonato Himno y Bandera Liga 60 di Aruba Juniors pa 2025 ta dedica Sr Felix Nene Mateo. Un baluarte den e mundo di baseball y softball Félix Antonio Mateo, miho conoci como “Nene” a nace na Bani Republica Dominicana dia 20 di november 1965. Nene a cuminsa hunga baseball cu 12 aña como pitcher. Rapidamente el a demostra su talento riba montículo tirando cu velocidad halto y hopi precisión.
Na 1982 destino a hib’e Venezuela unda el a sigui den baseball na Caracas. Aki el a traha su nomber como pitcher hungando pa e team di Rosales. Su capacidad pa poncha e bateadonan contrincante tabata impresionante. Asina el a bira e pitcher estelar di su team tirando 17 ponche den un wega y por poco a tira un wega perfecto.
Algun scout a busca Nene pero el a opta pa keda Venezuela unda el a sigui hunga su deporte stima.
Na 1991 un capitulo nobo a cuminsa den bida di Felix ora e ta muda pa Aruba. Anke el a stop di hunga baseball profesional, su amor pa e deporte no a stop. Aki el a cuminsa hunga softball cu The News, después el a hunga pa Quick Electrical, Los Amigos, Piratas y Quisquella.
Na 2023 Chago Hernandez ta acerca Nene pa e bin hunga pa Aruba Juniors. Su prome aña cu Aruba Juniors e ta demostra su talento saliendo campeon honronero di Liga 50 plus. Asina e ta bira un hungado importante pa su team. E ta hunga 10 aña den Liga 50 y recién e ta forma parti di e team di Aruba Juniors 60 plus. Aki tambe e ta resalta cu su velocidad y bateo. Remarcabel ta cu Nene ta un di e hungadonan cu semper ta na training riba diahuebs.
Banda di e oportunidad como deportista cu Nene a haya na Aruba Juniors e harmonia y amistad ta nifica masha hopi p’e. No ta trata di hunga so pero comparti cu personanan cu ta laga bo sinti como famia. Na training, wega gana of perde e ta sinti e calor di hermandad cual ta haci cu su amor pa e deporte ta sigui bibo. Banda di ta un tremendo deportista Nene semper ta dispuesto pa duna un man cu trabounan na club.
Felix su historia ta un ehempel di dedicación, talento y pasión marca pa esfuerzo y amor pa e deporte. Di Bani Republica Dominicana pa Aruba el a demostra cu baseball y softball ta mas cu un deporte, e ta un forma di bida.
