ORANJESTAD (AAN)- Benjamin Rogelio “Roy” Angela (q.e.p.d) tabata un persona hopi conoci den e mundo di deporte y awe ainda recorda den feliz memoria.
E ta conoci cu tur aña e tabata tene un fiesta pa e fanaticonan di baseball y ta premia esnan cu tin e mihor prediccionnan y homenagea algun hungadornan.
Apesar di su kebrante di salud Roy a cuminza prepara su fiesta pa su fanaticonan y invitadonan cu mester a tuma lugar dia 2 di December. Pero lamentablemente e no a mira su deseo mira realidad, ya cu el a fayece dia 23 November 2023 y e fiesta a wordo cancela.
Aunke cu Roy no tey mas, su deseo pa sigui cu e fiesta pa conclui su 10 aniversario di entregamento di premio den deporte, su Sra. hunto cu Sharine Geerman a dicidi cu e fiesta lo sigui na su honor.
E fiesta aki lo ta den Sportboys Club Diasabra awor dia 13 di April di 7.30 pa 3’or di marduga.
Ken ta Benjamin Rogelio “Roy” Angela.
BASEBALL
Na Msaart 1961, cu apenas 8 aña Roy a cuminza hunga baseball den e campeonato di Oranjestad Little League pa e team di Santa Cruz, Wrigley’s PK2. Siendo e hungador mas hoben Roy a lesa e “credo of huramentacion di Little League” pa habri e campeonato.
Na cabamento di añanan 60 Roy a cuminza hunga pa e team di Santa Cruz, Winton. Na 1969 Winston a bira campeon di A-Klasse y a promove pa Doble A. Na 1970 Winston a hunga den Doble A pero ora e campeonato a caba a bolbe degrada. Durante e siguiente añanan e team aki a cambia di nomber y a bira Santa Cruz Stars, J&B Santa Cruz, Sibonne y Santa Cruz RAoyals. Na 1980 el a bira Aruba Video Center te cu na final di añanan 90 cu e team a stop di existi. Durante tur e añanan aki Roy tabata un estrella di e ekiponan aki y a titula 2 biaha campeon di nos isla.
Roy a fungi tambe como manager di e team aki pa varios aña. Roy a hunga tambe un cantidad di biaha den e seleccion di Aruba y tambe den esun di Antiyas Hulandes. Na 1973 Roy tabata den e seleccion di Aruba cu a hunga contra Corsow y despues na November contra e seleccion di Cuba cu a bishita nos isla. Despues el a hunga hopi biaha mas den e seleccion di Aruba. Na 1983 Roy a hunga pa e seleccion di Antiyas Hulandes den e Weganan Panamericano na Caracas.
Aki ta sigui algun logro di Roy den bateo:
1974 di dos lugar den bateo cu e promedio di 333
1975 di dos lugar den bateo cu e promedio di 359
1975 lider den dobles conecta cu 7
1976 di dos lugar den bateo cu atrobe un promedio di 359; a marca historia cu tres aña sigui di dos lugar den bateo
1978 lider den homerun cu 3 y den hit bati cu 23
1978 a bati pa un promedio di 311 y a keda na di dos lugar den dobles cu 6
1982 di tres den bateo cu un promedio di 369
Na Mei 1984 den e wega contra Ennia Athletics Roy a logra e hazaña di bati 5-5.
FUTBOL
Meimei di añanan 60, a un edad basta hoben Roy a cuminza hunga pa Atlantico Deportivo den A-klasse. E campeonato 1970/71 el a yuda Atlantico titula campeon A-klasse y a promove pa Hoofdklasse. For di 1971 te cu 1975 Roy a hunga den Hoofklasse cu Atlantico.
SELECCION HUBENIL ARUBA
Na April 1970 el a wordo selecciona pa e seleccion hubenil di Aruba cu a hunga contra e hubenilnan di Corsow y Boneiro pa mira cua isla lo traha e seleccion di Antiyas.
SELECCION HUBENIL ANTIYAS HULANDES
Na Augustus di aña 1970 Roy tabata den e seleccion hubenil di Antiyas Hulandes cu a gana medaya di plata den e Weganan di Reino cu a tuma lugar na Aruba y Corsow. Na 1971 el a bolbe gana medaya di plata cu e seleccion di Antiyas den e Weganan di Reino cu a tuma lugar na Hulanda.
SELECCION DI ARUBA
Na December 1971 Roy a debuta den e seleccion di Aruba contra Corsow y Boneiro den e torneo interinsular di 40 aña di A.V.B.
Na Januari 1972 Roy a hunga contra e Seleccion Juvenil Magdalena di Colombia y tambe contra conocido equipo Millionarios di Bogota den e torneo internacional di 40 aña di A.V.B> Den e wega aki Roy a score un “precioso” gol y despues di e wega Roy a wordo invita pa MIllonarios pa haci un tryout na Bogota. Tur cos tabata cla pe haci e biahe pero pa un of otro motibo esaki no a sigui. Asina nos isla a perde di tin un hungador profesional mas pasobra Roy tabata tin tur e cualidadnan di bira un gran futbolista.
Na luna di Maart di e mesun aña Roy a hunga cu e seleccion di Aruba na Boneiro contra Corsow y Boneiro pa mira cua isla lo traha e seleccion di Antiyas Hulandes.
SOFTBALL
Den e deporte aki tambe Roy a destaca y a hunga pa e teamnan Chuchubi, Honda, Aruba Video Center y Royal Power. Cu e ultimo dos teamnan aki Roy a bira 4 biaha campeon di Aruba. Den e deporte aki tambe el a hunga den e seleccion di nos Isla.
BILLAR
Roy tabata tambe un excelente hungador di billar y a practica e deporte aki pa masha hopi aña. Cu e teamnan di Sport Boys, Technicos Santa Cruz y Kwihi Inn Roy a titula varios biaha campeon di nos isla.
Roy ta un baluarte di deporte. Y pesey ta invita tur fanaticonan di deporte pa e fiesta di 10 aniversario Diasabra awor dia 13 di April, y asina cumpli cu e deseo di Roy.
