Milly Bagheri-van Trigt, presidente FGA:
ORANJESTAD (AAN) – Den conferencia di prensa yama pa e Federacion Gymnastico Arubano (FGA) su presidente señora Milly Bagheri-Van Trigt, a comenta cu tur hende ta desea pa sigui crece den nan deporte, naturalmente.
Bagheri a menciona cu den Gimnasia e ta hopi dificil, e competencia ta masha fuerte, pero FGA su meta ta pa yega na campeonatonan cercano, cu ta di e Union Panamericano, pa logra ta den e prome 15 of 20 miho den e region.
“Eynan bo tin cu cuminza, y esey ta un proceso cu ta dura hopi aña, unda bo tin cu desaroya e atleta unda cu e tin un rango y nivel di tecnica hopi mas halto. Loke nos ta tratando di haci, door cu na Aruba no tin un gymzaal adecua completo, nos ta trahando cu paisnan cercano manera Brasil, Colombia, pa yuda nos cu campamento. Y asina, nos ta bay den un situacion hopi mas amplio y diferente, cu coachnan cu mucho mas experiencia cu yuda cu nos atletanan por yega na e nivel ey”, Milly a relata.
El a agrega cu e viahenan cu nan a haci a duna hopi bon resultado. Casualmente Diasabra un delegacion a sali pa Hapon. Hapon a invita FGA y nan lo tey pa dos siman cu nan top atletanan adulto, Anita, Ashly hunto cu nan coach Jenny. “Y nan ta bay tin un training intensivo, pasobra nos ta bay no solamente pa bay conoce y siña e tecnica, pero tin dos meta specifico pa cada atleta, cu nos kier logra ora nos bin bek”.
