ORANJESTAD (AAN): Directiva di Atletico Santa Fe a dicidi di reacciona publicamente riba incidente lamentabel di Dialuna anochi,
na unda nan a splica cu despues cu RCA a score un penalty un di nan hungadornan di Atletico Santa Fe U17 riba veld a wordo provoca door di un hungador di e contra partido di RCA cu a scop'e y a papia palabra malo cune, den e cayente di e wega na lugar di ignora dicho provocacion esaki a escala den un pelea entre hungadornan, cierto mayornan y fanaticada.
Como consecuencia, full e fanaticada di ambos banda a baha subi e veld. Na prome lugar nan kier ta hopi cla cu nan ta condena cualkier acto violento, y nan ta kere cu nan hungadornan semper mester mantene nan cabes frieu.
Directiva di Santa Fe y tambe e hungadornan ta lamenta cu den e caso aki esaki no a pasa. "Nos muchanan a bin ta traha hopi duro pa yega e final, y nan ta kere den e wega di futbol. Nos ta lamenta cu fanaticada, mayornan y te hasta coachnan a subi veld, nos como directiva ta condena e hecho aki. Nada cu pasa riba veld ta hustifica cu fanaticada, mayornan y/of coachnan ta subi veld y ta resorta na actonan di violencia".
Nan coach actualmente ta na hospital operando su man y nan ta desea e coach un pronto recuperacion. Coachnan ta personanan cu ta duna di nan tempo liber pa train nos muchanan, y nan ta e prome nan yama pa duna e mihor ehempel na tur momento.
Directiva di Santa Fe ta haci un apelacion na ambos fanaticada tanto na esun di RCA como esun di nan club Atletico Santa Fe, pa e amor di futbol, pa resa pa coach recupera uso di su man. Pero tambe pa hunga un wega amistoso y demostra na Aruba cu por hunga un wega manera hendenan civiliza.
Cu e incidente di ayera e unico perdedo ta Futbol di Aruba, paso e chikitonan presente ta mira tur loke nos ta hasi, y ta nos ta nan ehempel. Na tur momento tur hende mester demostra disciplina, respet mutuo y e amor pa futbol.
Directiva di Santa Fe ta laga un quote di Albert Camus un filosofo Franses pa reflexional.
“Everything I know about morality and the obligations of men, I owe it to football (soccer).” – Albert Camus
