Minister Endy Croes:
ORANJESTAD (AAN): Dialuna ultimo, durante Conferencia di Prensa di Gobierno di Aruba, Minister di Enseñansa y Deporte Endy Croes a anuncia cu despues di shete (7) aña Seleccion di Aruba por hunga su “home games” na Aruba.
Manera ta conoci, Compleho Deportivo Guillermo Prospero Trinidad na Dakota ta den proceso di renobacion. Desde aña 2016, e stadion tabata desaproba pa FIFA y Aruba no por a hunga weganan clasificatorio na cas y mester a bay den exterior pa haci esaki.
Minister Endy Croes a indica cu e stadion no ta cla ainda, pero FIFA a aproba e yerbe artificial y a haci algun excepcion pa e weganan clasificatorio di CONCACAF Nations League tuma luga na stadion Dakota despues di sheta (7) aña. Pues, e mandatario di Deporte ta invita Pueblo di Aruba pa bin apoya Seleccion Masculino di Aruba den CONCACAF Nations League, diasabra, 14 di october 2023 na Compleho Deportivo Guillermo Prospero Trinidad na Dakota, 3 or di atardi.
Despues di shete (7) aña Aruba por bay disfruta y apoya Seleccion di Aruba na cas atrobe, den un stadion cu ta cumpliendo cu tur standard internacional pa FIFA.
Pa finalisa, Minister Endy Croes ta desea Seleccion di Aruba hopi exito den CONCACAF Nations League. Cu disciplina, deseo, dedicacion y determinacion ta logra.
