ORANJESTAD (AAN): Diamars anochi venidero, 26 di april, bispo di Dia di Rey, no keda spanta si bo topa cu poco fantochi cu taco di billiard den man ta dwaal den Tanki Leendert y vecindario!
No ta Halloween a yega tempran, si no ta porta di santana di billiard a keda habri, lagando tur e trabuconan di e “epoca di oro” di billiard Arubiano sali pa un biaha mas haci mesanan di billiard “onveilig”!
E diamars aki, 26 di april, cuminsando pa 7’or di anochi, TT Billiards, situa na di dos piso di e edificio di Wendy’s na Tanki Leendert (entrada ta n’e trapi banda p’abou dje mall), lo tin e tremendo placer di presenta un anochi di “recordar es vivir” caminda dos di e legendario teamnan di billiard di decada 90 y 2000, esta Mad Dogs y Barracuda, lo enfrenta otro un biaha mas estilo “take no prisoners” den un "Ucraine Square Garden" pa determina cua ekipo mag titula nan mes “The King of Pool”! Un anochi inolvidabel caminda publico y amantenan di billiard por bin dal un keiro door di e “avenida di recuerdo” incluyendo un video traha door di VSPN di e legendario Indio Kelkboom den tempo di gloria. No ta “zomaar iemand” lo bin bataya na TT!
E legendario ekipo di tur tempo den historia di billiard na Aruba, e piscanan di fama, esta Barracuda, lo encera hungadonan di antaño manera David Franken, Aaron “The Baron” Franken, Richard “El Lobo” Wolff, David Brete, Indio Kelkboom, Gino Geerman, Buchi Maduro, Lucas “lucky Luke” Tromp, Sheik Orman, Pedro La Rosa, Andre Tromp, Win Dabian, Ditto Acosta, y reenforsa cu estelarnan jong manera Didi Odor, Jason Kock y ABC 9-Ball Champion 2022 Jorzinho Everon!
E piscanan di fama lo mester enfrenta un gang di cacho masha brabo mes den nomber di legendarionan di Mad Dogs manera entre otro Elvis Tromp, Errel "Fila Cajehera" Tromp, Mitchel “Pitbull” Kelly, Angelo “Machete” Tromp, Robby "RoboCop" Tromp, Raymond Eckmeyer, Andy Geerman, Tico "Cane Corso" Tromp, Johnny “Indiaanse Herder” Tromp, Armand “De Ridder” Ridderstap, Richard "Labrador" Gomes, Rosley Starke re-inforsa cu "Master" Ryan Rampersaud y "Zerothunder" Allan van Aanholt!
E formato di torneo lo ta Bola-8 best out of 3 sets, race to 5 sets. Set #5 lo ta worde hunga estilo Scotch Doubles. Shonnan, despues di dos decada, bin biba back e epoca legendario di añanan 90 y 2000, e “golden era” den billiard Arubiano, dia 26 di april venidero cuminsando pa 7’or di anochi na TT Billiards na Tanki Leendert!
