ORANJESTAD (AAN): E siman aki DIARIO a tuma nota, cu e delegacion di Aruba cu a biaha pa Weganan Panamericano Junior na Paraguay,
tin cu nan un ‘Welfare Officer’. Esaki sigur pues Aruba tin e bienestar di nos atletanan na mente den cuadro di deporte sigur.
E Weganan Panamericano Junior di Asuncion na Paraguay (conoci como ASU2025) cu ta cuminsa den 5 dia ta un evento special pa e delegacion di Aruba.
Esaki no solamente como e ta e prome Weganan di e Ciclo Olimpico nobo 2025-2028, si no tambe paso Comite Olimpico Arubano ta inclui un persona clave den e delegacion pa prome biaha.
Secretaria General di Comite Olympico Arubano y alavez e presidente di e comision di “Safe Sports” di PANAM Sports, esta Nicole Hoevertsz a splica cu un “Welfare Officer” ta un individuo designa den e delegacion kende ta responsabel pa e bienestar y seguridad di su miembronan, particularmente mucha y hobennan, y adultonan vulnerabel. Nan ta actua como un punto di contacto den caso di cualkier preocupacion relaciona cu salbaguardia, disciplina, conducta, of asuntonan di bienestar general.
Nan ta hunga un rol crucial den salbaguardia muchanan door di maneha y raporta preocupacionnan, y implementa procedimentonan pa proteha nan. Nan ta fungi como e prome persona di contacto pa tur hende cu tin preocupacion pa bienestar of conducta den e delegacion.
E Welfare Officer ta yuda promove un ambiente positivo, y ta haci esey pa tur miembro di e delegacion. Nan ta envolvi tambe pa promove y implementa e reglanan di e delegacion y procedimento, y pa ta sigur cu e miembronan ta al tanto di nan.
