ORANJESTAD (AAN): Arubaanse Voetbal Bond (AVB) a informa dialuna cu señor David Abdul a wordo oficialmente nombra como Regional Technical Consultant di FIFA.
Esaki sigur ta un logro grandi pa e mes, pero tambe pa Aruba henter, y ta mustra e progreso cu AVB y nos comunidad di futbol a logra huntu den desaroyo di futbol y tambe ta mustra e confiansa cu FIFA tin den e desaroyo di futbol aki na Aruba.
Den e rol nobo aki, señor Abdul lo traha directamente cu federacionnan di futbol pa duna nan sosten y guia technico. E lo tin un papel importante como mentor di directornan téchnico y den e coordinacion di proyectonan pa yuda desaroyá futbol riba 10 islanan diferente, promove union y progreso den e region.
David su nombramento ta basa riba hopi esfuerzo, entrega y trabou huntu. Cu un background como ex-profesional, entrenador y lider den AVB Academy, e a sigui traha pa yuda forma e futuro di futbol Arubano. Desde 2022, e tabata Director Technico di AVB y a guia proyecto importante manera e FIFA Talent Development Scheme (TDS). Bou di su liderato, Aruba a bira e prome pais den Caribe cu un Academia di Talento reconoci pa FIFA, un logro sin precedente.
AVB ta felicita señor Abdul pa e nombramento mereci aki. Ta un orguyo pa Aruba y un motibo pa sigui traha duro pa sigui hiba nos futbol dilanti. Ta desea David tur exito den su rol nobo, y ta confia cu e lo sigui pone Aruba riba mapa mundial positivamente.
Masha pabien tambe di parti di DIARIO.
