Futbol local keto bay stagna
ORANJESTAD (AAN): Varios reaccion a drenta relaciona cu e decision di Cuerpo di Arbitro na Aruba, cu a pone nan trabao abao, ora cu a bin realisa cu e ekipo infantil di Futbol a bolbe cuminsa usa e coach agresivo cu na luna di October a agredi y pone un Referee perde su wowo durante discusion cu a escala.
Un lider di un team di U-15, a splica cu como 5 aña pasa nan coach tambe a haye envolvi den un pelea durante wega, y su contrincante a wordo hiba Hospital. Esey tabata e ultimo biaha tambe cu e coach ey a ser permiti di subi veld pa e team, pues nan a core cune.
Pesey nan no ta compronde con despues di un ‘zware mishandeling’ asina, cu e team ta tapa solo cu un dede y djis laga e coach bolbe bay guia un team hubenil comosifuera nada a socede.
Mientras tanto, Cuerpo di Arbitro a bay sinta na mesa cu Arubaanse Voetbal Bond (AVB) riba e desaroyo aki, y cu nan a dicidi pa no fluit ningun wega mas tanten cu ta keda permiti e coach agresivo Neil Jansen na un veld di futbol. Es mas, AVB mes a expresa e deseo pa e coach Jansen aki hamas regresa na un veld of wega di futbol.
Diaranson anochi e reunion a tuma lugar, y AVB representa door di miembro di directiva y Hefe di Referee, a reuni cu representante di Cuerpo di Arbitro den e reunion unda a discuti e situacion actual y con por yega na otro pa resolve esaki mas liher posible.
Na final di e reunion, e status quo a keda mescos como cu e Cuerpo di Arbitro a indica cu nan tin di bay bek prome den nan seno, pa mira kico esnan den Referee ta dicidi, y asina lo avisa AVB bek riba e decision.
Diahuebs atardi, AVB a indica cu nan no a ricibi contesta ainda di Cuerpo di Arbitro, y esey nifcia cu weganan di Diahuebs a wordo posponi tambe como cu no tin referee pa fluit.
Awor ta sperando riba e decision aki sea Diahuebs anochi laat of riba awe Diabierna pa haya sa si e protesta lo escala, of si ta bay di acuerdo cu proposicionnan treci dilanti.
