ORANJESTAD (AAN): Copa Noord 2025 organisa pa SV Royal Power Tat Fat patronisa pa HEINEKEN ta wordo dedica na honor di
4 baluarte kendenan tin un trayectoria bunita y largo den deporte y den Copa Noord. Johannes “Poy” Flanegin, Alvaro Barrios, Samuel Nel Frank y Francis Arcaya e 4 baluartenan kendenan lo wordo homenahea dedicando Copa Noord 2025 na nan persona.
Historia di Johannes “Poy” Flanegin
Poy a cuminsa practica deporte na un edad poco mas grandi unda el a cuminsa hunga baseball y despues softball. Poy tabata un hungador activo tambe den futbol y zaal futbol. Poy a cuminsa su carera den fast pitch cu Sabana Grandi Stars cu despues a bira Aruba Wegenbouw. Poy a hunga tambe pa Olympic y a desaroya su mes na un edad hoben como un di e mihor pitchernan di fast pitch den historia di Aruba kende porcierto tabata tira masha duro. Poy a logra hiba Olympic AA y tin e unico “PEFRECT GAME” den softball AA na Aruba riba su nomber. Pues 21 out den fila sin ningun coredor subi base cual sigur ta un logro historico riba su record.
Poy a melita tambe den softball AA cu e ekipo Duracell y despues cu Astros unda tambe el a cosecha hopi exito cu varios titulo. Poy den fast pitch tin varios titulo como champion pitcher, champion batter y champion homerun. Poy Flanegin a representa Aruba den hopi selecion entre otro na Venezuela, Colombia, Argentina, Mexico, Ecuador, Panama, Hulanda, Bahamas pa nombra algun.
A logra Medaya di Brons den Juegos ODESUR na Venezuela na 1994, Medaya di Plata Bahamas den campeonato ECASC entre islanan den Caribe y Medaya di Brons den Campeonato Sur Americano na Bogota Colombia. Poy a hunga fast pitch AA na Hulanda den un ekipo Antillian Stars y a logra carga e ekipo aki pa campoen di Hulanda y despues campeon di Europa. Poy a titula champion pitcher den e campeonato Europeo. Poy a reforsa Frisian Flag den e campeonato World Slingshot Tournament na Hialeah Miami y a sali champion pitcher den e campeonato aki tambe. Na aña 1994 Poy Flanegin a wordo nombra softbolista di aña den premio Excelencia den Deporte.
Poy su team di su famia Happy Brothers y su trayectoria
Happy Brothers un ekipo di famia di mas di 30 aña tin un trayectoria largo den entre otro Copa ABC. Cu Happy Brothers Poy Flanegin tin hopi titulo di Champion Pitcher den Copa ABC. Poy a logra esaki na tur e islanan y esaki ta algo unico. Copa ABC cada aña ta na un otro isla y asina Poy a logra e hasaña y titulo di Champion Pitcher na St Martin, Corsou, Bonaire y Aruba. Alabes Happy Brothers tin titulo di campeon ABC tambe. Sigur ora nos papia di Happy Brothers nos no por keda sin recorda mayornan di Poy Flanegin esta Maca y Benny Flanegin (q.e.p.d) y e famia grandi kendenan na tur wega tey fielmente pa apoya Happy Brothers y crea e energia competitivo na tur tereno sea na Aruba of den exterior.
Johannes Poy Flanegin den Copa Noord
Poy Flanegin a cuminsa hunga den Copa Noord na un edad hopi hoben y na 1989 a titula campeon di Copa Noord cu e ekipo La Pandilla kendenan porcierto tin dos titulo di campeon den Copa Noord. Poy a hunga den varios ekipo. Poy a join Kwihi Power y tin varios titulo di campeon den varios campeonato na Aruba y Corsou. Poy Flanegin hunto cu Cindo Wester tabata e e pioneronan y e factor crucial momento a tuma un desicion pa Kwihi Power cambia di nomber y a bira Royal Power na aña 2003 pa asina drenta Copa Noord. Den promer aña den Copa Noord Royal Power a titula campeon lagando Tankileendert Giants 7-6 den tereno den final na veld di Monserat.
Poy Flanegin hunto cu Alvaro Barrios tabata e “one two punch” cu a carga Royal Power pa 7 titulo di campeon y 4 sub campeon den Copa Noord. Poy Flanegin ultimo añanan na un edad mas grandi awor ta activo ainda den Copa Noord melitando y dirigiendo e ekipo di Super Plus. Poy Flanegin tin varios titulo di Champion Pither y Champion Batter den Copa Noord. Esaki ta un parti chikito di e trayectoria largo y exitoso di un jui di tera cu un talento extra ordinario. Merecidamente SV Royal Power ta dedica Copa Noord 2025 na honor di Johannes “ Poy” Flanegin pa tur su aporte na deporte engeneral y sigur su contribucion na deporte di softball y Copa Noord. Masha masha pabien.
