ORANJESTAD (AAN)- E grito di antaño “un pa tera, un pa lama” lo resona awe cuminsando pa 2’or di atardi den bario di Boegoeroei, Shaba,
y Montaña ora cu e veteranonan den biyar crioyo enfrenta otro den e segundo buelta di e grandioso Copa Jani Brokke 2022 Bola 8 60+! Siman pasa tabata e dia pa “fula pulso”, pero e siman aki e losers round ta cuminsa y aki nan si no tin mañan!
Den prome buelta, Gino Geerman ta “survive” Nick Giel, wiskunde ta salba Ricky Quant for di legendario Buchi Briezen, Junini Quant ta domina Moonchi Kelly, Omar “Kilowatt” Lampe ta groin “Sheik” Orman, Franklin “Frenzo” Ruiz ta sacudi “Shorry” Giel foi otro, “Lucky Viviano” Frank ta gana Lotto cu Nelson y ta bisa “dankjewel”, Grandmaster Edwin Chirino ta gana Carlo “Pythagoras” Croes, y Ernesto “3-banda” Pardo ta mustra Pepe “Le Rosé” tur banda dje mesa!
Pues asina’ki e bataya pa awe ta defini! Tur cu a cay den losers round presenta 2’or pa wega por cuminsa tempran, y tur cu a sigui pa winners round presenta 3’or pa sigui cu e lucha! Den losers, Nick lo enfrenta Buchi, dos legendario den Horeca contra otro! Moonchi lo bataya Sheik, Shorry lo lucha cu Nelson, y nada menos cu Carlos “Pythagoras” Croes lo enfrenta Pepe “Mal ehempel” Le Rosé!
Den Winners cos ta cuminsa stoba cayente cayente ora Gino Geerman pone waterpas pa Ricky Quant, Junini lo controla coriente di Omar “Kilowatt” Lampe, Franklin “Frenzo” Ruiz lo drenta tombola cu “Lucky Viviano” Frank, y por ultimo, dos veterano grandi lo enfrenta otro ora Ernesto Pardo bataya Edwin Chirino! Shonnan, no keda sin presencia e clash di siglo aki, awe diasabra cuminsando pa 2’or di atardi na Fermin’s Bar .
