Un reunion cu bista riba e siguiente Ciclo Olimpico
ORANJESTAD (AAN): E importancia di reuni cu federacionnan deportivo regularmente pa asina ricibi actualisacion di nan procesonan ta clave, como e federacionnan deportivo ta e miembronan mas importante pa e desaroyo di deporte na Aruba.
Den e caso aki, miembronan di Direccion di Deporte a sinta cu miembronan di Directiva di Aruba Karate Bond ,Presidente Sensei Gustavo Velasquez, Tesorero Sr. Patrick Jansen y Comisario Sr. Ahli Mirjah pa asina combersa riba e tema aki.
Alabes a papia riba e posibel participacion na un campo di entrenamento cu ta wordo organisa door di Centro Caribbean Sports na Panama den e luna di November awor.
Por ultimo, a duna di conoce cu atleta Rob Timmermans, cu a representa Aruba na e Weganan Panamericano di Santiago 2023 y gana un medaya di brons den Karate Kumite, ta desea di participa na e World Games di 2025 bou di e bandera di Aruba.
E reunion sigur tabata uno ameno, unda a haya di compronde cu e federacion ta riba un bon trayectoria, cu varios atletanan hoben cu potencial den ambos disciplina cu ta Kata e parti di e arte y Kumite cu ta e parti di combate.
Federacion di AKB lo haci uso di e posibilidad di bay cu 2 atleta pa e campo di entrenamento na Panama, pa asina yuda den e proceso di desaroyo di rendimento.
Pa loke ta trata e atleta Rob Timmermans, ta contento pa mira cu unabes mas e lo kier representa Aruba den un wega di e magnitud aki, y sigur cu su nivel como atleta, e lo por destaca y trece resultado pa Aruba.
Fuente: Facebook Page COA
