Cu bista riba un maneho deportivo innovativo pa futuro
ORANJESTAD (AAN): Despues di un proceso di transicion cu a worde planifica cuidadosamente durante un periodo di varios aña, Directiva di Comite Olimpico Arubano a nombra señora Monica Fajardo Rico como Director Tecnico.
Monica lo tin como tarea principal pa dirigi Direccion di Deporte cu e departamento tecnico di Comite Olimpico Arubano.
Monica sigur no ta un cara desconoci pa e federacionnan deportivo, como el a fungi como Metodologa di Comite Olimpico Arubano di januari 2020 te cu awor. Monica ta tuma over e funcion di Lic. Edmundo Josiah, cu a guia y maneha e proceso tecnico di e Comite durante varios aña.
Comite Olimpico Arubano ta gradici profundamente e trabao di Edmundo durante tur e añanan cu el a encabesa e departamento tecnico, unda el a mustra gran dedicacion y determinacion na desaroya y yuda crece deporte na Aruba. Banda di esaki, Edmundo a yuda orienta Monica durante e ultimo 5 aña, asina pasando tur su conocimento y experiencia practico. Alavez ta felicita Monica cu su reto nobo, cu sigur ta bon mereci danki na e tremendo trabao desplega desde su prome dia cu COA casi 5 aña pasa.
Monica ta semper pone deporte riba prome luga, y ta haci su maximo esfuerso pa asina yuda tur federacion y atleta logra yega na maximo potencial. Monica ta destaca como un persona cu ta haci investigacionnan profundo y usa su conocimento profesional como metodologa pa asina logra resultadonan concreto.
