ORANJESTAD (AAN): Shonnan, e temporada candeloso di biyar a cuminsa p’e temporada di 2024! Manera di costumber, FEBIAR, Federacion di Biyar Arubano,
ta organiza den temporada final di tur aña e candeloso torneo di bola 8 pa ekipo. E aña aki, tin tur indicacion cu porta di santana a keda habri! No menos cu 6 ekipo ta participa, di cual un di nan t’e grandioso comeback di un dje ekiponan mas activo di aña 2001, esta The Gladiators!
Un otro ekipo cu a join y cu tambe tin algun hungado cu a scapa foi santana cu porta habri, t’e ekipo nobo di NO MERCY. Tin entendi cu nan ta conta cu re-aparicion di guereronan di decada 2000, esta Alex Wu y Andino Emerencia!
Diabierna dia 26 di juli e campaña a start cu encuentro desastroso p’e e kiponan di Mad Dogs, No Mercy, y Mongoose! Steelers a pone hero den curpa di e gang di cacho brabo cu score di nada menos cu 5-1! Riba otro mesa, e Gladiatornan a mustra sin piedad contra e team No Mercy, y a suta nan cu score di 5-2. Mester remarca si cu ta net e dos hungado cu porta di santana a laga scapa, esta Alex Wu y Andino Emerencia, a gana nan wega convincentemente. Y pa culmina, e legendarionan di Barracuda a pasa djente skerpi den curpa di Mongoose cu score di 5-1.
Pues shonnan, diabierna awo 9 di augustus, cuminsando pa 7:35 di anochi (Standard Atlantic Time pa esnan cu semper ta confundi horario), e palacio di biyar aya na Tanki Leendert lo t’e scenario un biaha mas di otro anochi cu bataya fuerte riba mesa berde! E Gladiatornan lo enfrenta Steelers, Mad Dogs lo purba trece Barracuda tera, y Mongoose lo bataya cu No Mercy! Shonnan, bini un bini tur, manera semper, entrada ta completamente gratis pa pueblo en general bin goza di un anochi di biyar di calidad halto. Yega!
