ORANJESTAD (AAN) - Diadomingo 20 di November, 2022 atleta local Gregory Geerman a participa na Philadelphia Marathon.
Un marathon cu a cuminsa 7’or di mainta den un temperatura di -3 grado Celsius. Un temperatura acompaña cu biento duro cu sigur tabata un desafio grandi pa Gregory.
E meta principal tabata pa termina Philadelphia Marathon bou di 3 ora y 20 minute pa asina clasifica pa Boston Marathon. Boston Marathon ta un di e seis (6) marathon nan cu mester completa pa bira un “Abbott World Marathon Majors six-star finisher” pa ricibi e “Six Star Medal”, cual ta e deseo di mas grandi di Gregory.
Gregory a finaliza Philadelphia Marathon cu un gran exito. Apesar di e temperatura, subidanan y biento duro Gregory a demostra su forsa mental y condicion fisico y a termina cu un pace average di 4.38 y un tempo di 3:18:02 cu ta confirma su participacion pa Boston Marathon.
Roga Innate Foundation ta un fundacion cu ta aporta na deporte y e salud di atleta y persona cu ta haci movecion. Roga Innate Foundation ta admira Gregory pa su disciplina y pasion pa e deporte di coremento y ta sumamente orguyoso di Gregory y ta sostene durante su trayectoria pa e keda logra su metanan como coredor.
{gallery}Bou di un temperatura di -3 grado Celsius, Gregory ta logra su meta y ta clasifica pa Boston Marathon{/gallery}
