ORANJESTAD (AAN)- Diahuebs mainta durante un conferencia di prensa na IBISA,
caminda tabata presente Sra. Julissa Angela di Biking Squad Aruba, Edgar Erasmus di Ibisa y Minister Endy Croes, a wordo anuncia cu dia 6 di November, Biking Squad Aruba lo tene nan prome cycling awareness ride.
Segun Sra. Angela, nan ta un grupo di 50 miembro activo di entre 35 pa 45 aña caminda nan ta haci uzo di diferente camindanan di Aruba. Pero lamentablemente ultimo temponan tin hopi accidente sosodiendo cu ciclistanan caminda nan ta keda cu daño tanto fisicamente como materialmente.
Mirando esaki nan a bin cu e idea pa bin cu un awareness ride.
Sr. Erasmus a bisa cu e meta di e cycling awareness ride aki cu lo tuma lugar dia 6 di November 2022 saliendo for di ex Bushiri Hotel y yega eynan bek ta pa concientiza automobislitanan como tambe ciclistanan y tambe tur esnan cu tin cacho los pafor di cura.
E ride lo ta uno suave caminda tur clubnan miembro di bicicleta por participa. Lo Sali pa 6.30 for di ex Bushiri Hotel bay direccion San Nicolas, 1 prome break ta na Iceberg, despues sigui pa Carnival Village pa e di dos break, despues ta bin bek abao pa Veld Universal y di eynan bek pa Ex Bushiri Hotel.
Tin espacio pa 500 participante y Ibisa ta pidi cooperacion di tur automobilista pa tene cuenta cu e mainta aki.
Minister Endy Croes durante e conferencia a bisa cu e ta apoya eventonan asina cu ta pa conciente e pueblo y ta pidi pa automobilistanan baha velocidad. Hunto por concientiza un pueblo.
Inscripcion ta te dia 2 di November y ta 15 aña bay ariba.
