ORANJESTAD (AAN): Awe Diasabra lo tin wega, y seleccion di Aruba porfin lo bay hunga varios “home games” riba e isla aki mes,
despues di 7 aña sin por a haci esey. Recien gobernantenan a bay check e training di Seleccion Masculino.
Minister Endy Croes a indica cu e stadion ta den pleno renobacion y no ta cla ainda, pero FIFA a aproba e yerba artificial y a haci algun excepcion pa e weganan clasificatorio di CONCACAF Nations League tuma luga na stadion Dakota despues di 7 aña.
Desde aña 2016, e stadion tabata desaproba pa FIFA y Aruba no por a hunga weganan clasificatorio na cas y mester a bay den exterior pa haci esaki.
E mandatario di Deporte ta invita Pueblo di Aruba pa bin apoya Seleccion Masculino di Aruba den CONCACAF Nations League, diasabra, 14 di october 2023 na Compleho Deportivo Guillermo Prospero Trinidad na Dakota pa 3’or di atardi.
