Mira muchanan di kleuter haci Kids Athletics
ORANJESTAD (AAN): E dianan a yega! Muchanan di scol ta cla pa bay bataya den deporte pa mira cual ta bay bira e ganaodrnan maximo.
Awe Diabierna 4 di April 2025, tin e apertura oficial di Weganan Escolar di e aña aki, conoci como “WE 2025”.
Apertura oficial awe: William Erasmus kende ta relacionista publico di Instituto IBiSA, a indica cu esaki lo cuminza awe Diabierna pa 5:00 pm riba tereno di Centro Deportivo Frans Figaroa na Noord. Despues di esey evento di Kids Athletics mes lo start pa 5:40 pm y sigui te cu 7:00 pm.
E scolnan cu lo participa den Kids Athletics e prome atardi pa anochi lo ta Arco Iris School, Prinses Amalia Basisschool, Scol Preparatorio Washington, Imelda Kleuterschool, Prome Paso Kleuterschool, Rayo di Solo, Mon Plaisir Kleuterschool, y Scol Preparatorio Nos Paraiso.
Erasmus a indica durante un conferencia di prensa, cu WE 2025 lo ta di 4 di April te cu 16 di April 2025, pues dos siman continuo di actividad. Tin algun dia cu tin 2 deporte tambe.
El a splica cu orguyosamente IBiSA ta divulga cu e biaha aki WE 2025 lo tin total di 1.300 alumno di scol participando. Pa seccion di Scol Preparatorio tin dos disciplina di deporte, esta ‘Kids Athletics’ y ‘Futbol’. Pa seccion di Scol Basico lo tin cuatro disciplina di deporte, esta ‘Futbol’, ‘Volleyball’, ‘Landamento’, y ‘WE Mente’. Pa Scol Secundario tin dos disciplina di deporte, esta ‘Volleyball’ y ‘Futbol’.
Erasmus a indica cu e prome atardi mes tin competencia di “Kids Athletics”, y ta algo hopi leuk pa mira e muchanan chikito aki participa den competenciaan di Sprint Hurdles, Formula 1, Speed Leader, Cross Hopping, Beanball Throw, Knee Throw, y Endurance.
Preparando e Final: Segun esnan di IBiSA, e ultimo actividad lo ta dia 16 di April 2025, cu ta na Compleho Deportivo Frans Figaroa cu yama “WE Mente”. Lo bay tin esaki, y na final di dia lo tin entrega di premio pa Docentenan di Aña, Scolnan di Aña, MVP di WE 2025.
E parti aki lo pasa live via Streaming Online. Lo tin diferente premio pa Weganan Escolar, a base di ‘ranking’. Lo saca premionan pa 1er lugar, di dos lugar, y di tres lugar pa tanto categoria di Kleuterschool, Scol Basico, y Scol Avanza.
