Algo positivo sin duda alguno pa futbol
ORANJESTAD (AAN): Manera cu DIARIO a trece dilanti caba na comienzo di siman cu a pasa, cos no a bay bon durante e wega entre S.V. Atlantico Deportivo contra di S.V. Arsenal.
Durante di e partido cu a tuma luga diahuebs ultimo 23 di maart entre S.V. Atlantico Deportivo vs S.V. Arsenal den Copa Division Uno, e referee mester a para e wega na di 82 minuut pa motibo di bringamento cu a tuma luga entre e hungadonan.
A base di e rapport di e referee e hungadonan y miembro di e clubnan envolvi a haya suspension temporal di AVB y a worde informa di esaki tambe.
E situacion aki a pone cu inhustamente critica ta wordo lanza den direccion di Directiva di AVB pa cu e decision drastico aki.
E decision ta corecto? Den un entrevista cu president di AVB, esta Randolf Lacle, el a mustra DIARIO cu e bond di futbol tin su reglamentonan. Pues ora algo asina aki socede, loke nan ta haci ta check kico e reglamentonan ta prescribi, y tin di actua segun e texto.
“Nos no por haci nada otro cu no ta poni den nos reglamento,” Lacle a indica. “Ta esey ta loke nos tin di actua riba dje, y esey a pone tambe cu basa riba rapport di referee, a tuma e decision e ora cu e hungadornan aki ta wordo suspendi, y nan lo wordo yama pa Straf Commissie, pasobra nan tin derecho di wordo scucha tambe nan version, y asina nos lo haya e decision di Straf Commissie kico ta pasa cu e hungadornan aki.
Straf Commissie ta un entidad independiente di AVB, pa tuma un decision riba e casonan asina.
E president di AVB a bisa cu nan a bin tuma nota ultimo añanan cu tin mas violencia riba veld y rond di e deporte di futbol, y e menazanan cu ta presenta den weganan hubenil. Pa Lacle e ultimo parti ey ta un problema hopi grandi, pasobra e ta bay fo’i man y net algo cu tin di haber cu wega pa hubentud.
Lacle a bisa cu nan como Federacion, a tuma contacto cu autoridadnan concerni pa busca guia, no djis pa AVB sino pa e miembronan tambe, pa asina haya guia y sa con tin di atende cu e problema aki na mihor manera.
AVB sa cu e problemanan aki no ta algo cu tin di haber cu futbol, pero lamentablemente e ta ‘culmina’ net durante wega di futbol. Esaki ta un factor cu tin di tene cuenta cune, y tin e saber con pa actua.
Nan sa cu e dirigentenan di clubnan ta haciendo todo lo posible y hopi biaha nan ta acudi na AVB tambe, y nan a haya señal di e clubnan pa nan bay ‘haci algo’ pa e situacion cu ta birando menazante. Asina AVB a contact Cuerpo Policial, unda a tene recien un workshop interesante, unda a haya input di e clubnan pa asina scucha nan, y haya sa kico nan ta sinti y pensa di e problema, y tabata importante pa Cuerpo Policial tabata presente pa nan a compronde con e situacion ta.
Con cu bay bin, e Club hopi biaha ta mihor na altura di loke ta pasando bao hubentud, compara cu cualkier otro instancia. Segun Randolf Lacle di AVB, e parti ey ta algo valioso si bo bay mire den e imagen mas grandi, pa sa con pa atende cu e problema aki y esey ta algo cu nos por hunga un rol eyden.
AVB ta convenci cu e workshop teni recien ta e comienzo pa yega na un consensus cu tur hende kico lo bira e prome accion, pa asina tur dirigente y club ta riba mesun linea, pa asina ora algo socede ya nan sa kico pa haci. Nan sa cu nan lo bay ta atende mas di problemanan social aden, cu tambe tin di bay traha y expande riba dje, como cu nan ta liga cu otro tambe.
Den e workshop, Cuerpo Policial a duna hopi bon feedback, a yuda e clubnan cu number di telefon, contacto cu Polisnan di Bario, y cu nan ta habri pa ricibi informacion di AVB tambe si di adelanta por informa nan cu na cierto wega lo por spera kizas problema of conflicto.
Otro siman DIARIO lo bin cu mas detaye di esaki.
