ORANJESTAD (AAN): Dia 15 di Juni 2021 ultimo, den un ambiente ameno e 8 clubnan di atletismo como tambe coremento, a topa otro pa e eleccion di e directiva nobo di Arubaanse Atletiek Bond (Aruba Athletics Federation).
Bou direccion di señor Keith Joseph y señor Michael Serralta di NACAC (North American, Central American and Caribbean Athletics Association) y despues di dos termino bao guia di presidente saliente, Evelyn Farrell, e miembronan a vota pa un cambio completo di directiva.
Señora Virgina “Gina” Dirksz di Olympia Track & Field Club a keda eligi como presidente nobo pa e proximo termino. Como Secretaria General ta un cara nobo, esta Nizana Solognier di iRun Aruba y como tesorera Moraima Maduro di Olympia Track & Field.
Safiera Schippers- Mohamedradjia di Aruba Malmok Runners, Fernando de Graf di Good 2 Be Active, Lemike Werleman di All Distance Runners Aruba y Richard Luydens di Olympia Track and Field a keda elegi como comisarionan di directiva.
E directiva nobo a duna un palabra di gradicimento na e directiva saliente pa e trabou desplega y un aprecio grandi na tur e clubnan cu a pone nan confiansa den nan. Tin hopi reto na caminda, pero sigur tambe hopi oportunidad pa contribui na atletanan di Track & Field y Road Running y tambe pa crecemento di e deporte tanto local como internacional. Palabranan di Pabien y Hopi Exito ta bai pa nan tur.
Riba e potret: Directiva 2021 y representantenan internacional
