ORANJESTAD (AAN): E ta un realidad di bida, cu ciudadanonan ta sigui hunga semper nan “number vast”,
pasobra e ta facil pa corda, y bo tin e speransa cu un dia e bolitanan lo sali na bo beneficio.
Esey ta loke Arbey a haci tambe, y el a bay cumpra su numbernan vast pa e sorteo di Big 4. Y claro el a bira feliz pa nota, cu su numbernan a sali ganador.
Diamars mes el a acudi na oficina di Lotto na Playa pa reclama su premio. Aki nan a revisa su ticket pa check si el a pone su firma, y ora di scan e barcode, e computer a confirma cu Arbey a gana e premio di 20.000 Florin.
Mesora su tras nan a cuminza cu e proceso pa transferi e premio electronicamente pa su cuenta di banco. Arbey a indica cu e ticket ganador el a cumpra na Pearl Lottery.
