Pa recauda fondo:
ORANJESTAD (AAN) -- Diadomingo durante atardi, por a ripara un stagnacion riba e caminda entre rotonde di Tanki Flip y rotonde di Tanki Leendert, tur esaki debi cu Adai Racing a organiza un mini Car and Bike show dilanti Tienda Geerman, pa asina recauda fondo pa e auto di Drag.
Ambiente tabata great y tanto esnan presente como esnan cu a pasa eybanda, a disfruta di un dushi atardi. Tur hende sa cu pa por tin un auto of brommer di Drag, ta rekeri un bon fondo y esaki sigur ta un bon manera pa recauda fondo pa dicho vehiculonan.
Keda pendiente, ya cu den luna di Augustus venidero, Old School Bike, tambe ta bay tin un Car and Bike show, p’asina recauda fondo pa yuda Women’s Club of Aruba y un Racing team cu ta trahando un auto nobo.
