Rycond Santos Do Nascimento contento y satisfecho:

Parlamentario Marco Berlis, fraccion MEP:

ORANJESTAD (AAN)—Den conferencia di prensa, Parlamentario Marco Berlis a toca e tema di economia, con por wak e economia di Aruba crece, durante  e siete añanan di Gobernacion di Partido Movimento Electoral di Pueblo, compara cu e gobierno anterior di bandera berde.

            Berlis a señala cu el a investiga un rato y a lesa e rapport di EBA (Economische Bureau Amsterdam), cual ta indica cu entre 2010 pa 2016, apenas tabata tin un 5.5 % di increase, di e economia di AVP, mientras cu por wak di aña 2017 pa 2024, e economia a crece bao di Gabinete Wever-Croes 1 y 2, na 27.6%.

Segun Berlis, no ta por nada cu Aruba su economia ta uno record, turismo ta record, y finanzas ta flow den e caha di gobierno, pasobra e economia a crece na un manera hopi grandi. “Y nos por mir’e tambe, atravez di e cifranan di EBA, cu ta duna un rapport tocante esaki”, Berlis a acentua.  Un otro cos cu por ta wak ta e desempleo. Entre 2010 cu 2017 e desempleo tabata tin un average di 7.3% pa 10.6%. Un porcentahe masha halto mes.

• 
•  

“Pero desde cu Gabinete Wever Croes 1 y 2 a sinta, a tuma e mando di esaki, entre 2017 pa 2024 di 8.9 cu a haye, awo na 2024, e ta na 4%. Si compare cu tempo cu AVP tabata sinta, AVP tabata tin un desempleo 2.5 biaha mas halto cu e mandato di Gabinete Wever-Croes”, Berlis a duna di conoce.

            El a agrega cu aki por wak cu ora bo goberna seriamente, tin pueblo na pecho y traha responsablemente, cu ta cumpli cu tur e normanan indica, bo ta traha cu responsabilidad y diligencia, bo por wak e resultadonan den tur area.

            “Mi por bisa tambe cu cifranan no ta gaña y e rapport di EBA, ta duna tur indicacion. Por bay den su website y wak tur e rapportnan pa bo mes. Y asina aki, mi ta encurasha bo pa educa bo mes pa por wak e diferencia entre gobernacion di un cu otro. Mirando tambe cu tempo di AVP tabata un tempo di bonanza, nan no a sa di probecha pa drecha economia y finanzas, nan no a sa di baha e desempleo, si no nos lo a wak cu tur e cosnan aki tabata for di control, pero bao di Gabinete Wever Croes 1 y 2 nos por a wak adelanto, stabilidad, progreso, apesar cu tabata tin crisis financiero, y cu tabata tin pandemia, minister presidente Evelyn Wever-Croes a sa di lidera Aruba y hib'e padilanti, y produci resultadonan cu ningun hende por nenga”, Marco Berlis a vocifera.

ORANJESTAD (AAN) -- Partido M.E.P. e aña aki lo participa pa 18 biaha na un eleccion electoral.