Parlamentario Shailiny Tromp-Lee (MEP):
ORANJESTAD (AAN): Parlamentario Shailiny Tromp-Lee ta expresa: “Mi no por imagina cu un parlamentario por ta contra un prestamo na FCCA y aumento di nan subsidio cu meta pa traha mas casnan social y garantisa viviendanan pagabel.”
Mirando e decision incomprendibel di Gabinete Eman-Croes durante tratamento di Presupuesto 2025 caminda Minister Wever a kita e 17 miyon florin cu Gabinete Wever-Croes a destina pa un fiansa na FCCA na interes hopi abou pa nan por cuminsa traha mas cas social y tambe 2,7 miyon pa aumenta nan subsidio structuralmente, mi a dicidi pa invita FCCA pa un reunion den Comision di Finansas.
Un reunion pa FCCA mes bin duna splicacion y subraya e urgencia. Mirando e discucion den Parlamento, pero tambe esun publico, mi a haya na su lugar pa FCCA bin brinda e informacion necesario y tambe contesta tur pregunta cu por tin.
FCCA mester apoyo financiero di Gobierno
Mescos cu Gabinete Wever-Croes a splica den e nota di cambio, FCCA a enfatisa cu sin ayudo di gobierno, nan no por traha mas cas social. Esaki ta hopi lamentabel mirando cu FCCA tin un lista di espera di mas di 3700 peticion pa cas social. Como Parlamentario mi ta di opinion cu awor cu tin espacio financiero, ta e momento pa nos cumpli y duna atencion y prioridad na e necesidad pa viviendanan social.
Gobierno actual a kita e sosten financiero presupuesta pa MEP pasobra segun nan mester bin un investigacion mas profundo y pa esaki nan mester bolbe reuni cu FCCA, cual reunion apenas a tuma lugar e siman aki. FCCA sigur a splica kico tur caba nan a haci pa purba logra pa haya placa presta na interes abou sin e resultado desea. Tambe FCCA a presenta nan plan cu ta cla caba, solamente nan falta e prestamo di Gobierno na interes abou pa por start sali. Alabes FCCA a indica cu nan no por sigui carga e maneho di huursubsidie (vivienda pagabel) si no ta ricibi e indexering necesario, cual Gabinete Wever-Croes tambe a tene cuenta cu ne cual ta cu a propone pa hisa e subsidio di FCCA cu 2,7 miyon florin pa aña. Cu e aumento aki FCCA por sigui tene e huurprijs di e casnan social abou. Esaki ta un peticion di FCCA di hopi aña caba y awo cu Gobierno por cumpli cun’e debi na e espacio financiero cu e surplus ta trece cune, mester haci esaki tambe.
FCCA a purba tur manera pa haya fondo
E reto grandi pa yega na fondo ta algo cu FCCA tin algun tempo caba y nan a haci nan huiswerk. Nan a purba local, nan a purba na Hulanda y tambe riba mercado internacional. Realidad ta cu nan no ta yega na e recursonan financiero necesario pa por traha e casnan social cu ta asina un necesidad grandi bou di nos hendenan.
FCCA a indica cu nan a reuni na varios ocasion cu Gobierno riba e reto aki y den pasado nan a atende e punto aki cu Parlamento tambe. Awor cu tin espacio financiero e solucion mas factibel ta pa Gobierno presta FCCA e placa pa asina FCCA por traha e viviendanan necesario, locual den pasado a yega di pasa caba. Na 2009 Gabinete Oduber (MEP) a fia FCCA 10 miyon florin di e placa di Plant N.V. na interes abou di 2% pa asina FCCA por a traha casnan social. Dus no ta algo nobo.
Coalicion ta di acuerdo cu e prestamo of no?
Despues di e reunion di parlamento cu FCCA mi no por imagina cu por tin un parlamentario cu ainda por ta contra un prestamo na FCCA y aumento di nan subsidio. Ta di spera cu den e voorjaarsnota y presupuesto supletorio cu dentro di poco gobierno mester presenta na Parlamento e suma di 17 miyon florin pa e fiansa na FCCA y e 2,7 miyon florin di aumento structural di nan subsidio keda incorpora bek den e presupuesto y cu parlamento lo aprobe. Ta innecesario pa bay haci full e investigacion di nobo, perde luna y tempo valioso pa yega na e mesun punto. Gobierno tin e espacio financiero y e ta e prome yama pa yuda mirando e situacion.
E proyecto aki ta uno necesario
Pa termina mi kier enfatisa cu otro instancianan manera Banco Central di Aruba y IMF tambe ta pidi atencion pa e situacion di falta di casnan pagabel. IMF te hasta den nan evaluacion financiero y economico di Aruba, Article IV Mission, ta evalua kico Aruba ta haci pa cumpli cu e necesidad pa por tin suficiente casnan pagabel na Aruba. No por lubida tampoco e metanan di desaroyo sostenibel, SDG 11, cu tambe ta exigi gobiernonan pa inverti den casnan pagabel.
Awor ta e momento, e fondonan t’ey, nan tawata aloca caba y mi ta spera Gabinete Eman-Croes lo haci lo corecto y cumpli cu pais y cu nan propio programa.
