Clifford Heyliger, fraccion AVP:
ORANJESTAD (AAN)-- Parlamentario Clifford Heyliger, di fraccion di AVP, ken a coordina e reunionnan di Parlatino cu a tuma lugar na Aruba, dianan 24 y 25 di September ultimo, refiriendo na e posibilidadnan di contacto comercial, entre otro cu Uruguay, cu a mustra interes den un contacto cu Aruba, a contesta un pregunta, den entrevista cu DIARIO, relaciona cu e costo di bida asina halto na nos Isla, y tocante un tema specifico cu ta e aumento drastico di prijs di material di construccion.
Ki posibilidadnan por tin pa bira nos bista riba otro paisnan cu por exporta material di construccion pa Aruba, y cu ta mas cerca di nos region y, kizas, por brinda prijs mas accesible cu esnan cu tin mara nos mercado local, na costonan hopi caro, entre otro door distancia largo cu ta haci sumamente halto e prijs di flete?
Parlamentario Heyliger a bisa cu tin conexion cu, por ehemplo Colombia, cu por conecta cu ministernan pero tambe compronde kico e pueblo kier, pasobra parlamentarionan a haya e feedback directo for di e pueblo.
“Hunto ta purba di wak kico ta otro alternativanan. Como Parlamentario, nos no por djis cambia e ley p’aki, p’aya, no tin necesidad. Pero nos ta wak kico ta haci na Colombia, Argentina, Chile, Brasil, anto djeynan trece esey bek pa Aruba, of hib’e bek pa nan. Nos tin cu keda cu mente habri pasobra hopi biaha nos ta wak Latinoamerica mara ‘ah, nan no tey’. Mi a experiencia riba energia algun pais ta hopi adelanta. Si nos kita for di pensamento e huicio riba e paisnan, mas oportunidadnan ta habri pa nos”, Parlamentario Heyliger a señala.
