Ta entrega tur derechonan Constitucional di Parlamento
ORANJESTAD (AAN): Na Den Haag, e reunion cu Raad van State a bay hopi positivo, segun parlamentario Rocco Tjon a indica na su salida di e reunion. Na momento cu e topico di Rijkswet HOFA bin riba mesa mesora ta bin riba mesa e situacion di finansas publico di Aruba. Orguyosamente Aruba por bisa cu e finansas di Aruba ta bon stabil y cu e proyeccion nan te cu 2030 tambe ta positivo. Tur e resultadonan aki ta debi cu siman pasa a ricibi un presentacion di directie financien y full e delegacion cu ta na Hulanda sa di e parti positivo aki di Aruba cu e finansas di Aruba a keda maneha corectamente.
Un otro topico interesante cu e elabora riba dje ta “poder politico” y sr Andy Lee a indica claramente cu como Pais bo no kier depende di un poder politico aheno, pero practicamente cu un Rijkswet di HOFA ta esey ta bay sosode y lamentablemente Aruba lo no por sali mas for di dje sin cu “Politiek Den Haag” tuma e decision.
Cu e Rijkswet di HOFA ta duna e poder politico di Den Haag pa dicidi riba Aruba, pero parlamentario Rocco Tjon cu ta forma parti di e delegacion ta contento di por a scucha cu Raad van State lo tuma den nan conseho tur cos cu ta toca e Rijkswet incluyendo e historia, tuma esaki nan den consideracion.
Parlamentario Rocco Tjon ta duna di conoce cu na momento cu d COHO tabata riba mesa a busca consehonan huridico di profesornan Hulandes riba e materia y e consehonan aki a resulta di ta beneficioso pa Pais Aruba mirando cu a mustra e poder, e desbalansa den poder di parti di Hulanda.
Na e momentonan aki MEP ta buscando consehonan huridico como fraccion di MEP pa demostra un biaha mas cu e caminda cu Rijkswet HOFA a cana no ta esun corecto. Den su totalidad e reunion a bay uno hopi positivo unda cu hopi pregunta a ser haci riba e parti di consensus Rijkswet y a keda treci hopi cla padilanti cu na momento cu drenta den e ley di Rijkswet HOFA Aruba no lo por Sali y na mes momento Aruba ta entrega su derechonan constitucional di parlamentarionan na Parlamentarionan Hulandes.
