Parlamentario Eduard Pieters di PPA:
ORANJESTAD (AAN): Miembro di Parlamento Eduard Pieters pa fraccion di PPA ta expresa su aprecio pa e atencion cu gobierno ta duna na e tema vital di ‘food security’. Segun Pieters, e problema di seguridad di alimentacion no ta un tema local, sino mundial y Aruba cu ta depende di mas di 90% di importacion di alimento, mester trata esaki cu prioridad nacional.
Sinembargo, e ta adverti cu e manera e proyecto di Agri Innovation Park ta implementa, ta keda incompleto y excludente.
Un plan cu ta exclui nos propio hendenan
“Nos ta sumamente contento cu gobierno ta atende e asunto di seguridad di alimentacion,” Pieters a bisa, “pero si e plan no ta inclui nos propio cunukeronan y agricultornan, nos no por yama esaki progreso.”
Segun e destaho publico anuncia, fase 1 ta consisti di un estudio di factibilidad economico, un ‘business case’ y un diseño tecnico di maneho pa e agri innovation park. E destaho ta busca hende of compania cu tin experiencia den ‘glastuinbouw’, esta greenhouse di glas, cu conocemento den analisis economico di agricultura sostenibel.
Fraccion di PPA ta lamenta profundamente cu e manera cu e destaho ta formula, ta un manera masha elegante di cera e porta pa nos propio cunukeronan, pues nan no tin acceso ni experiencia formal den ‘glastuinbouw’.
“Ta imposibel cu gobierno ta aplicando inclusion, paso ta nos mesun agricultornan no por aplica,” Eduard a agrega. “Gobierno a crea un sistema cu ta exclui nos pueblo mes, mientras cu ta predica innovacion y sostenibilidad.”
E logica ta falta ora nos exclui nos base agricola
Segun Pieters, un sistema di seguridad alimentario sostenibel mester nace di nos mesun tera y cu nos mesun pueblo. El a recorda cu hopi cunukero ta traha duro pa planta bonchi, pinda, yambo, maishi y comcomber, sin casi apoyo, sin infrastructura y sin awa suficiente.
“Nos cunukeronan y agricultornan kier innovacion y nan kier haci esaki na un manera adapta na e clima di Aruba,” Eduard a enfatisa. En bes di importa ‘glastuinbouw’ di zona friu, nos por haci uzo di agrisolar, hydroponics, robotics y Inteligencia Artificial, pues tecnologia cu ta sostenibel y comproba caba na e paisnan seco manera, Maroco y Somalia.
Un apelacion pa un cambio di rumbo
“Un innovacion park sin inclusion di nos agricultornan ta un paradoxa,” Pieters a bisa. “Nos ta papia di food security, pero nos ta exclui e mesun hendenan cu ta garantisa e alimento di pueblo.”
Eduard ta pidi claridad di parte di ministerio y ta lansa preguntanan manera: Ki rol Santa Rosa tabatin den e proceso aki? Si acaso e institucion aki tabata forma parti di e idea aki of no? Pieters ta insisti cu gobierno mester inverti den nos propio pueblo, den sciencia local y experiencia Arubiano, pa logra un modelo di agricultura berdaderamente sostenibel.
Eduard Pieters a conclui bisando: “Si nos kier food security real, e mester ta pa tur hende. E mester ta inclusivo, duradero y cu un base Arubiano. Esaki ta loke PPA ta defende, y lo sigui defende den Parlamento”
