Eduard Pieters di PPA:
ORANJESTAD (AAN): E pregunta cu mas a resalta den fin di siman na PPA tabata: Pakico a cera Departamento di Mucha y Hoben (DMH), cu ta parce mas di ta un decision burocratico combina cu sed pa negligencia politico. Tin un cantidad di documento manera di e.o. S.E.R., Unicef, KPMG, Adviescommissie 2005, etc. cu tabata boga pa bin cu un ley pa regula e centronan di cuido di mucha na Aruba, manera ta na tur parti mundo.
Den wega no ta cuestion di presupuesto, wega politico, pero seguridad y bienestar general di Aruba su muchanan, esunnan mas vunerabel den nos comunidad. E movecion aki ta uno iresponsabel y un paso enorme atras, cu ta mina decada di advertencia, obligacion local y internacional y progreso fragil cu nos ta haci den proteccion di mucha.
Un historia di negligencia: “For di e añanan setenta, Aruba a mira un crecemento descontrola den centro di cuido di mucha. E gobiernonan anterior a reconoce esaki y a traha riba e Ordenansa Nacional Centro di Cuido di Mucha, cu ta rekeri permiso pa opera un centro di cuido di mucha y cu esey mester ta mara na standard di calidad: cualificacion di personal, espasio disponibel, higiena, seguridad y guia pedagogico.
Pero pa mas di 30 aña e ley a keda den lachi, yena di eror tecnico y di ehecucion, sin implementacion y boluntad politico”, Eduard a señala. E gobierno di AVP na 2017 ta esun a bolbe pasa e ley aki den Parlamento, pa asina den 2018 cuminsa na implementa e ley.
Ignora: Por mira pues cu e roadmap di implementacion completamente ignora. Segun Eduard a sigui bisa: “Cerando DMH ta desvia totalmente di e roadmap cu tanto instancia y comunidad a pidi. Ademas for di nos fuente di informacion nos por a compronde cu tin un ‘instellingsbesluit’ traha pa DMH. E preguntanan ta e ora: Con y ken lo sigui vigila e Registro Nacional di e Centronan di Cuido di Mucha? Ken lo supervisa y preveni un centro sin permiso y sin seguridad pa sigui opera? DMH a duna un base di supervision cu finalmente a crea un minimo di confianza.
Mas pio ainda, DMH a introduci un sistema di Intervencion Trempan pa mucha entre 2–4 aña, den colaboracion cu DVG/JGZ. Esaki no tabata un luho, sino un necesidad pa detecta problema tempran y salba direccion di desaroyo y carera escolar di un mucha. Ta iresponsabel pa stop cu e programa y e lo kita tur speranza di e famianan y specialmente e muchana, cu mas mester tin dje”.
Unda e evidencia ta: E punto crucial: unda e rapportnan cu ta prueba cu DMH a faya ta? Unda e evaluacionnan di su impacto, investigacion di su eficiencia, of audit di su presupuesto ta? Esaki ta parce di ta un decision tuma sin fundamento, sin transparencia, y sin profesionalismo. Den fondo esaki ta parce mas un movecion pa complace un grupo chikito, cu ta pone e bienestar di nos muchanan na ultimo lugar y ganashi propio na prome lugar.
Muchanan prome: Segun PPA, nan ta pone nos muchanan prome cu politica/ “Cu e ceramento di DMH ta obvio un traicion di confianza, profesionalismo y transparencia cu pueblo y tur e profesionalnan cu a traha riba varios aspecto importante pa Aruba su muchanan. Tambe e ta obstaculisa ehecucion di e ley di “kinderopvang” cu ta asina importante pa siguridad y desaroyo optimal di nos muchanan. Liderazgo berdadero ta ora bo ta defende derecho di esunnan mas vunerabel y no ta sacrifica nan pa un movecion politico.
Nos muchanan mester ta na prome luga y PPA lo exigi transparencia, responsabilidad y accion. Aruba no por sigui biba cu un gobierno cu ta trata derecho di mucha manera un opcion of wega di popularismo. Nos muchanan merece siguridad, proteccion y un futuro digno,” Eduard a finalisa bisando.
