Parlamentario Eduard Pieters (PPA):
ORANJESTAD (AAN): “Bon Aña Nobo, Aruba. Un Aña Nobo ta inicia cu un un pagina blanco, yena di posibilidad, reto y speransa. E ta un momento pa para keto y pa mira futuro cu honestidad, determinacion, perseverancia y curashi,” ta deseo sincero di Eduard Pieters, parlamentario di fraccion di PPA.
“Un aña nobo no ta elimina e pasado, pero e duna nos e oportunidad pa skirbi un mihor historia. Un historia unda respet ta gana riba division, unda responsabilidad ta mas fuerte cu indiferencia y unda liderazgo ta sirbi cu integridad. Den e aña cu a pasa, nos a wak cu Aruba tin un pueblo resiliente, cu su hendenan cu a sigui traha, cuida y soña, hasta ora e circunstancianan tabata dificil y desafiante”.
Eduard Pieters ta convenci cu Aña Nobo ta un invitacion pa uni riba principio: honestidad, solidaridad y husticia den tur sentido di palabra. Ta un yamada pa no keda keto, ora e cosnan no ta corecto y pa no perde fe den dialogo y cooperacion. Progreso real ta nace ora nos scoge pa traha hunto, gobierno, comunidad y ciudadano, cu un vision comun pa bienestar general. Pero tambe ta un momento pa inverti den nos hubentud, pa cuida nos mayornan y pa fortalece confianza entre nos hendenan y nos institucionnan. Ora nos pone dignidad humano den centro di nos decisionnan, nos ta crea un pais mas fuerte y mas husto.
“Pa e aña nobo aki, mi compromiso ta firme: traha cu claridad, curashi y respet pa pueblo Arubano. Mi invitacion ta pa tur ciudadano: laga nos transforma reto na oportunidad y palabra na accion. Bon Aña Nobo, Aruba! Laga speransa guia nos paso y laga nos futuro wordo defini pa loke nos construi hunto awe”.
