Parlamentario Ricky Hoek (MEP):
ORANJESTAD (AAN): Den Haag a sirbi como e centro di un reunion tripartiet importante entre e comisionnan parlamentario di Aruba, Corsou y Sint Maarten.
E reunion aki, dirigi pa señor F. Brownbill, Presidente di e Comision di Relacion di Reino y Parlamentario di Corsou, tabatin como meta pa discuti varios tema di importancia comparti y yega na compromiso concreto.
Ta bon pa menciona cu e aña aki, Corsou ta na turno pa guia e reunion Tripartiet.
Parlamentario di Fraccion di MEP, Ricky Hoek, a bay Hulanda pa asina participa di e reunionnan aki.
E ta comparti un resumen di e puntonan principal cu a wordo discuti y e acuerdonan cu a tuma luga.
'Geschillenregeling'
Un di e puntonan principal tabata e 'Geschillenregeling'. E delegacionnan a bay di acuerdo cu e ante proyecto presenta pa Aruba. E delegacion di Aruba lo manda un version final na e otro delegacionnan, esta Corsou y Sint Maarten den e siman di 17 juni 2024. Cada parlamento tin te fin di juni 2024 pa duna nan opinion. Si nan ta di acuerdo, Aruba lo presenta e concepto di ley formalmente pa tratamento, Hoek a señala.
Trafico Aereo entre e islanan
Un otro tema importante tabata promove e trafico aereo entre e islanan na prijsnan accesibel. E prijsnan halto y e limitacion den conexion ta punto di preocupacion. E gobiernonan lo traha hunto cu partnernan local pa busca solucion, parlamentario Hoek a duna di conoce.
Deficit Democratico
E delegacionnan a enfatisa riba e importancia cu e gobiernonan mester duna informacion na nan parlamentonan tocante e procesonan di e leynan di Reino den consenso (consensus-rijkswetten). E acuerdonan ya caba a wordo estableci durante e reunion Interparlamentario Koninkrijks Overleggen (IPKO) anterior. Cada Parlamento lo mester acorda cu nan respectivo gobierno con y ki ora ta comparti e informacion pa garantisa e rekisito di consenso.
Reorganisacion di e sistema di Impuesto
A discuti tambe e transicion di impuesto directo pa impuesto indirecto. E tema aki a wordo discuti suficientemente pa awor, Hoek a indica.
Combatimento di Pobresa
Riba e tema aki tambe a discuti y keda cera temporalmente. E parlamentonan lo sigui monitor e tema aki. Hoek a indica cu hopi dato interesante a bin dilanti y riba esaki e lo elabora den un otro articulo.
Cuido di Salud
E delegacionnan a intercambia experiencianan tocante cuido di salud mental (GGZ) y cuido di hende grandi. A indica problemanan di salud mental creciente entre hubentud, falta di experto y facilidadnan, y presion riba fondo di pension pa motibo di 'vergrijzing'. E delegacionnan a acorda pa mantene e temanan aki riba e agenda y stimula e ministronan responsabel pa duna suficiente atencion.
Enseñansa
Pa loke ta e tema di enseñansa, studiantenan y ex-studiantenan di e parti Caribense di Reino ta topa diferente obstaculo na Hulanda, manera problema di deuda y limitacion di vivienda. E delegacionnan a acorda cu cada pais mester sigui busca alternativanan den ley y reglamentonan di e sistema fiscal pa crea incentivonan cu ta promove oportunidadnan pa e studiantenan bin e islanan bek como tambe haci e paisnan di origen mas atractivo pa nan regreso. Entre otro a papia riba posibel garantianan laboral, descuentonan den e debenan di estudio, segun Ricky Hoek a splica.
Informacion tocante Rijkswet
Banda di esaki tabatin un presentacion tecnico tocante Rijkswet y e implicacionnan legal tocante proteccion di dato personal. Esaki tabata organiza pa empleadonan di Direccion di Ley y Asuntonan Legal di Ministerio di Asuntonan General y Ministerio di Gobernacion, Planificacion di Corsou.
Fondo di Reino pa Cambio Climatico
Ricky Hoek a laga sa cu porfin a discuti e necesidad pa un Fondo di Reino pa cambio climatico. E delegacionnan lo traha hunto pa uza e fondo disponibel optimalmente y desaroya strategianan.
Durante e proximo IPKO na Aruba lo organiza un presentacion tecnico di expertonan. Finalmente, mester bisa cu e reunion tripartiet a subraya importancia di cooperacion y responsabilidad comparti den e enfrentamento di desafionan comun.
E acuerdonan cu a tuma ta marca un paso dilanti den fortalecimento di loke ta uni Aruba, Corsou y Sint Maarten y ta duna speransa pa cambio positivo den futuro cercano, asina Parlamentario Hoek a finalisa bisando.
