Parlamentario di Fraccion di AVP, John Hart
ORANJESTAD (AAN): Parlamentario di Fraccion di AVP, John Hart a expresa cu a yega momento pa drecha tur caminda pasobra ta p’esey pueblo ta cumpli cu su deber pa paga impuesto riba number di auto. Esaki el a menciona durante tratamento di Presupuesto di DOW den Parlamento diamars ultimo.
El a expresa cu e manera cu ta hiba maneho den infrastructura pa e ultimo añanan, ta inaceptabel remarcando cu mester cambia e mentalidad di sigui ‘patch’ nos careteranan.
Segun e, a base di un inventarisacion tecnico cu DOW a haci hunto cu Minister di Infrastructura, Baba Herde, a conclui cu tin un retraso den nos careteranan di 355 kilometer cu ta ekivalente na e suma di 160 miyon florin.
“Esaki ta un señal cu si nos no cambia nos mentalidad, e pagador di Impuesto nunca ta bay wak e calidad di caretera cu e merece. Siguridad riba careteranan ta e responsabilidad di Gobierno”, el a enfatisa.
El a referi tambe na pregunta cu Fraccion di MEP a haci e minister, na unda e Fraccion di MEP ta puntra con ta posibel den tur e añanan aki, e ciudadano no ta wak miho calidad di careteranan. Riba esaki, Parlamentario Hart a remarca cu Fraccion di MEP tin hopi curashi pa puntra esaki mientras nan ta esnan cu a goberna den e ultimo 7 añanan y no a haci e cambionan y awo, basa riba e inventarisacion, nan ta haci e pregunta aki.
“E esencia ta, cu si nos continua aceptando cu mediocridad ta normal, nunca lo wak cambio. Gobierno di Aruba no solamente mester identifica e problema, pero mester soluciona e problema, y cu urgencia”, Parlamentario Hart a enfatisa.
