Parlamentario Evelyn Wever-Croes na Minister Gerlien Croes:
ORANJESTAD (AAN): Parlamentario Evelyn Wever-Croes a bin ta tuma nota cu den e ultimo dianan aki e Gobierno nobo ta wak hopi atras riba kico por a pasa den pasado, pa asina por cuminsa cu cierto investigacionnan. Esaki sigur no ta algo malo pasobra investigacion ta trece confiansa y transparencia den comunidad. Pero ta importante si pa e Gobierno nobo aki realisa cu mas importante ainda ta pa nan cuminsa enfoca riba e retonan actual di pais Aruba, y especialmente riba un vision pa futuro.
Loke Parlamentario Wever-Croes si ta condena ta e hecho cu tin ministernan cu den nan sed pa investiga ta atachando integridad di nos profesionalnan sin a haci dicho investigacion prome. Aki Parlamentario Wever-Croes ta referi na insinuacionnan haci pa Minister Gerlien Croes riba fundacion Futura, na unda e ta insinua cu e fundacion aki lo no a haci bon uzo di e fondonan cu nan a haya.
Ta importante pa Minister Croes realisa cu haciendo e acusacionnan aki, e no ta atachando e integridad di Parlamentario Wever-Croes sino di esnan cu ta traha na Futura y di e centenares di profesionalnan cu a traha hunto cu Futura riba e diferente proyectonan.
Como un mandatario di pais Aruba, Minister Croes por a yama e ekipo di Futura aden pa dun’e un presentacion di tur e proyectonan. Tambe e por a subi e website di Futura na unda e por a wak tur e proyectonan y raportnan entrega pa e fundacion durante e ultimo añanan, prome cu el a bay den media pa insinua cosnan cu no ta berdad, atachando asina integridad di e hoben profesionalnan cu ta traha eynan.
Otro alternativa tabata pa Minister Croes acudi cerca Prome Minister Eman cu tin tur e informacionnan necesario di fundacion Futura cu Prome Minister saliente Evelyn Wever-Croes a entreg’e como parti di su traspaso. Akinan e por a haya un miho idea na unda tur e fondonan di fundacion Futura a wordo aloca, evitando asina cu e ta bay den media pa insinua cosnan sin base.
Minister Croes en realidad ta un minister nobo sin experiencia den gobernacion, cual no ta algo malo, pero esey no ta dun’e e derecho di sali eyfo y ataca nos profesionalnan sin haci un debido investigacion. E ta hopi importante pa semper ta bon informa, prome cu sali insinua cosnan.
“Ami ta kere den nos talentonan hoben local, y pesey e tipo di insinuacionnan aki ta hasi dolor. Mi conseho na Minister Gerlien Croes ta; Ora bo tin tanto odio y envidia asina no ta bon. Innovacion ta e creatividad di busca solucion pa problema y retonan existente, pero si bo ta yena di odio asina nunca bo lo mira e solucion of e oportunidadnan cu tin, y esaki ta blokia innovacion. Pa un minister di e pais aki actua cu envidia y odio no ta para nechi y vooral cu bo ta un minister hoben y femenino” Parlamentario Wever-Croes a expresa.
