Juni Croes di AVP:
ORANJESTAD (AAN): E ciudadano Juni Croes kende den ultimo eleccion a aparece riba lista di Partido AVP, a reacciona riba un asunto actual, y e ta bisa cu ta danki na decisionnan dudoso di Partido MEP, Aruba no tin speranza mas pa actividad petrolero den e refineria di San Nicolaas.
E refineria cu un biaha tabata simbolo di progreso y empleo pa pueblo, awe ta un ruina di hero bieu, danki na MEP cu pa 7 aña largo a laga e refeneria den abandono. Contrario cu Curaçao cu si a logra mantene nan refineria operacional, Aruba a perde su oportunidad pa un futuro industrial y laboral. No por keda sin menciona cu:
(*) E refineria a wordo sera pa Partido MEP, door di a laga Citgo bay cu 350 miyon dollar den un manera hopi dudoso.
(*) E instalacionnan a keda den abandono sin mantencion, hasta bira un monumento di negligencia.
(*) Pueblo di San Nicolaas y Auba ta cansa di promesanan falso cu refineria lo habri atrobe, ora cu tur hende sa cu e oportunidad a pasa pa semper danki na e mesun Partido MEP.
Pueblo, no keda sorprendi cu den e dianan dilanti MEP lo purba na hunga cu bo sentimento un biaha mas, no keda sorpendi cu nan purba yama pueblo pa un otro payasada di ora"cero" atrobe ,door di e ansha grandi di MEP pa yega na poder un biaha mas. Pesey enberdad mester bin un reunion publico den Parlamento di Aruba. Un reunion publico na unda tur parlamentarionan presente, y specialmente e parlamentarionan di San Nicolaas, mester haci un solo pregunta cu pueblo ta spera respuesta pe:
Ken ta esnan cu a beneficia door di laga CITGO bay cu 350 miyon dollar? Ademas di reunion publico, Parlamento mester kisas propone pa bin cu un comision independiente di investigacion , cu expertonan nacional y internacional, pa:
(*) Investiga e transacion cu CITGO y e salida di 350 miyon Dollar.
(*) Determina ken a gana y ken a perde den e proceso aki.
(*) Publica un informe oficial pa pueblo di Aruba, pa restituí confianza y pa preveni cu tal negligencia ripiti den futuro y si ta necesario entrega un keho penal na ministerio publico.
E pueblo tin derecho pa sa ken a gana y ken a perde den e transaccion cu a pone fin na un capitulo industrial y crucial pa Aruba. E silencio no por sigui, y e responsabilidad ta riba Partido MEP, pa duna claridad ariba e situacion aki.
