Otmar Oduber:
ORANJESTAD (AAN): Tin lider cu nan legado no ta midi solamente den proyecto of cifra, sino den e historia humano cu nan a laga den pueblo. Sr. Otmar Oduber tambe ta un di e lidernan ey. Durante diferente etapa di su bida politico, el a mustra cu reconocemento, memoria y respet pa historia di Aruba no ta djis un acto simbolico, sino un deber moral. Awe, dilanti di reinauguracion di e Monumento di Piscadornan Perdi, ta mesun legado humano ey ta rebibi.
Un minister cu a laga marca positivo den diferene etapa! Sr. Otmar Oduber tempo e tabata minister pa partido AVP, a realisa hopi proyecto significante, entre nan e renobacion di Plaza Betico Croes, unda a inverti un miyon Florin pa transforma e plaza na un espacio digno, algo cu nunca antes no a sosode. Esaki a mustra su vision pa espacio publico y memoria historico.
Mas dilanti, ora el a sirbi como minister pa fraccion di POR, Oduber a sigui pone enfasis riba reconocemento di e personanan cu a contribui enormemente na construccion di Aruba. Un ehempel cla ta e caminda cu a wordo dedica na sr. Nelson Oduber, como un gesto di aprecio y gratitud pa su aporte na nos pais.
Reconocemento tambe pa e constructornan di Aruba: Segun Otmar Oduber, den e mesun espiritu, e reciente dedicacion di un caminda na sr. Henny Eman ta un reconocemento na su lugar. “Henny Eman tabata un gran visionario y un di e constructornan di Aruba moderno. Na tempo di Status Aparte na 1986 y durante e crisis profundo despues di perdida di refineria na 1985–1986, el a mustra liderazg den e momentonan dificil” Oduber a expresa.
“Sr. Henny Eman tabata sa con pa pone turismo florece y posiciona Aruba riba mapa mundial, siguiendo e vision pionero di Juancho Yrausquin den añanan 50. Duna reconocemento na nos politiconan cu a nifica tanto pa Aruba no ta debilidad, sino madures”.
E monumento: Un herida cu no conoce un ciere. E historia di e Monumento di Piscadornan Perdi ta toca profundo. Trece atras memoria di 13 aña pasa, ora como minister di sector primario, Oduber tabata di cerca cu grupo di piscador y famianan di esunnan perdi. E abrazo, e lagrima, e silencio di ayera, ta mesun sentimento cu awe.
“E famianan cu a perde nan sernan keri riba lama, semper lo keda cu e bashi di no por despedi. E speranza doloroso, si nan por ta bibo ainda, na otro pais, kisas Venezuela, ta keda sin contesta concreto. Esaki ta e realidad humano cu e monumento ta representa.
Un historia personal, comparti awe, a mustra con e dolor ey ta sigui generacion tras generacion: un trahador cu su tata tabata un di e piscadornan honra riba e monumento. E emocion ta real, profundo y permanente,” Otmar a indica.
Finalmente Otmar Oduber kier gradici minister Wendrick Cicilia pa restauracion di e monumento, pero mas cu tur cos, pa honra e pensamento noble cu tin tras di dje. “E hecho cu hende di tur partido ta bini hunto pa un causa asina humano ta mustra cu Aruba por logra cosnan grandi ora nos pone politica un banda y pone bienestar di pueblo prome,” Otmar a finalisa bisando.
