Segun Rudy Lampe di RED:
*Falta di integridad a bira normal akinan
ORANJESTAD (AAN)-- Señor Rudy Lampe, di Partido Red Democratico, den un entrevista cu Matutino DIARIO, a expresa cu “falta di integridad na Aruba a bira normal” y e tin un trayectoria largo den esaki. E ta referi na e ley pa no persigui “politiconan corupto” cu locual, absolutamente, e no ta di acuerdo cu ne.
Lampe a bisa cu e por menciona diferente ehemplo, y a comenta cu na Mei ultimo tabata tin un sentencia di Hof, pa loke ta SKOA Werksternan, cual no a wordo presenta den prensa.
“Pero Hof, despues di tanto aña ta bolbe duna mi razon cu bo no por sin mas, kibra ley, uza placa di pueblo pa yuda trahadornan, pasobra bo por tin e miho intencion di mundo, bo por yuda hende pero sin kibra ley”, segun Rudy Lampe.
El a agrega cu Hof a bisa cu e falta di integridad ey ta di SKOA, pero ken tabata responsable p’esey? Parlamentario Goeloe. “E tabata un di e responsablenan di SKOA. Y p’e ta normal e falta di integridad ey, y nada no ta pasa, y el a causa un daño na miyones di florin na Pais Aruba. Mi tabata den e Comision di Berdad hopi aña pasa, nos a documenta cantidad di proyectonan di corupcion cu tabata tin.
E Departamentonan Central Accountingsdienst, Departamento di Recurso Humano, Contraloria General, tur ta detecta iregularidadnan, pero ni un ta haci denuncia. Kiermen, e ora ey tin cierto tolerancia tambe di e falta di integridad”, Lampe a declara.
El a bisa tambe cu mientras e tabata minister el a haci cinco denuncia di corupcion cu el a haya den enseñanza, cu a costa pueblo miyones di florin, y ni un a wordo investiga. Landsrecherche a bise cu nan no tabatin experto financiero pa bay investiga corupcion. Y tur e cosnan aki a keda comosifuera “Laga e cos pasa”, manera falta di integridad ta algo normal.
El a bisa cu e colmo tabata ora el a presenta e iniciativa pa independiza DPS, hacie un stichting cu profesionalnan. El a entrega su poder como minister pasobra e no kier tabata envolvi metemento di politica den e maneho diario di scolnan publico. SEPPA a protesta y tur fraccion di Parlamento cu excepcion di RED pasobra tur a bay di acuerdo cu metemento di politica mester sigui, den e maneho diario di scolnan publico.
CONTRA MANIFIESTO OTMAR:
Rudy Lampe a referi na Manifiesto di Otmar Oduber, cu e ta califica como “colmo di e colmonan” Hof a bisa cu e falta di integridad a bira un cultura na Aruba, pero Otmar a bay hunto cu fraccion di AVP y fraccion di MEP, tur a para banda dj dje, pa bin cu un ley p’asina sostene politiconan pa nan no bay cera, manera un ley cu tin na Hulanda, pero cu e gabinete Jetten a bin cu un proposicion pa kita e ley aki, anto na Aruba nan kier introduci un ley similar, unda cu Parlamento of Conseho di Minister ta dicidi si ta persigui un politico. “Cacho no ta come cacho, tog?” Kiermen, e ora e ni un politico mas ta bay cera. “Nos no ta di acuerdo cu esey”, Rudy Lampe a remarca. El a splica cu e Gabinete Jetten na Hulanda kier bin cu un estilo cu nos tin na Aruba, cu ta Procurador General di Hoge Raad, ta bay haya e poder di dicidi si ta persigui un minister of ex minister. “Aki nos tin’e caba. Bo ta haci denuncia na P.G cu bo pruebanan contra un minister of ex-minister y nos kier pa e keda asina aki. El a conclui bisando cu tin varios mandatario na Aruba cu mester ta den KIA pasobra nan a haya hopi daño financiero na Pais Aruba!
