Rapport di SVb ta demostra cu aumento di pensioen di Mike Eman ta irealistico

Parlamentario Marco Berlis (MEP):

ORANJESTAD (AAN):  Despues di simannan largo di silencio, Mike Eman a confesa den un rueda di prensa cu e mester a “rehabilita su mente” pa por a procesa e sentencia fuerte di su amigo Benny Sevinger. Mike Eman a demostra den e rueda di prensa cu e ta prefera keda amigo cu tur esnan cu ta viola, horta y corumpi e pais aki, enbes di ta un amigo di pueblo y cumpli cu “Good Corporate Governance.”

            Mientras Mike Eman ta insisti di keda brasa corupcion, Mike Eman ta coriendo campaña cu promesanan falso di lo bay aumenta pensioen cu 50% cu simplemente nos pais no por carga atrobe. Ken ta bisa esaki? Un Rapport di SVb, cual minister di Economia sr. Geoffrey Wever a pidi pa SVb traha y cual ta demostra cu e rumbo cu Mike Eman kier hiba e fondo di pensioen ta e mesun direccion catastrofico cu e la hiba Aruba durante su gobernacion devastador na 2009-2017. 

Rapport Amplio di SVb ta contradeci Mike Eman

            Riba peticion di minister Geoffrey Wever dia 9 di April 2024, SVB a haci un investigacion riba e proposicion di Mike Eman. SVb a analisa varios scenario di aumento di pensioen proponi pa Mike Eman y pa mira kico nan efecto lo ta riba e fondonan di SVB;

1. Scenario 1; Aumento di e suma di pensioen cu 50%, cu ta AWG 718.-, den un solo biaha na 2025. Den e scenario aki e gastonan di e aumento ta subi cu 7 miyon florin.
2. Scenario 2; Aumento di e suma di pensioen cu AWG 359,- na 2025, despues cu AWG 359,- na 2028. Den e scenario aki e gastonan di e aumento ta subi cu 7 miyon florin.
3. Scenario 3; Aumento di e suma di pensioen cu 50%, cu ta AWG 718.-, den un solo biaha na 2025, teniendo na cuenta e suma di ingreso di e ciudadano. Den e scenario aki e gastonan di e aumento ta subi cu 9 miyon florin.
4. Scenario 4; Aumento di e suma di pensioen cu AWG 359,- na 2025, despues cu AWG 359,- na 2028, teniendo na cuenta e suma di ingreso di e ciudadano. Den e scenario aki e gastonan di e aumento ta subi cu 9 miyon florin.
5. Adicionalmente SVB a haci un investigacion di e aumento di e pensioen cu 50% y ta saca e fondonan di e “ouderdomsfonds” y si e ta wordo financia por completo cu e fondo aki, e lo keda bancarota pa 2026. Esaki ta loke Mike Eman a haci caba den su gobernacion di 2009-2017 cu nos pais ora e la hisa e debe nacional te cu 90% di su GDP, sin conta gasto di PPP.

            E rapport di SVB ta mustra pueblo bon cla cu e fondonan di SVb no lo por sostene e plan ficticio di Mike Eman. Mike Eman ta duna un bista bon cla na pueblo cu dia e drenta gobierno e lo plunder nos fondonan di pensioen, crea mas debe y deficit y hiba nos tur den otro era catastrofico di mal maneho y corupcion. Manda e fondo di pensioen bancarota den dos aña ta e “bon comun” di Mike Eman? Priminti y perhudica nos pais pa ambicionnan di poder ta e lema di e “bon comun?”