ORANJESTAD (AAN) – Lider di Partido RAIZ, Ursell Arends, tambe tabata cerca Gobernador Diamars, parti mainta.
Miembronan di prensa a entrevist'e, tocante su crecemento como un partido nobo cu a yega hopi cerca di un asiento na 2017, y cu e biaha aki a logra dos, y riba su mes a crece hopi.
Arends a yama danki na tur e votadornan, cu a deposita nan confianza den RAIZ. E mes no por a celebra esaki cu e seguidornan di RAIZ, pero e kier a expresa un aprecio hopi grandi, di curazon pa e 5.474 persona cu a deposita nan voto y nan confianza den RAIZ pa hunto nan por cambia e politica na Aruba.
Nan tey pa sigui eherce e cambionan cu nan kier mira den politica y pa su persona esaki ta un honor masha grandi mes. “Nos a traha duro, durante e ultimo cuater añanan, nos a forma un team dinamico manera mi a bisa den diferente ocasion, di 12 lider riba nan mes, y awo nos ta mira e resultado di e confianza cu nos a haya den comunidad” Ursell Arends a expresa.
Arends a sigui bisa cu RAIZ ta cla pa sigui duna contenido na esaki, y asumi nan responsabilidad. Desde nan inicio RAIZ a para pa integridad, y e fundeshi di integridad pa e partido aki, ta democracia.
“Y nos a sali na varios occasion, pa respeta nos Institutonan. Nos a respeta Raad van Advies, Algemene Rekenkamer, y den pasado nos a sali pa respeta e Instituto Gobernador, y e aña aki nos a sali pa respeta e Instituto Electorale Raad, y pa colmo de los colmos, awe mes nos tin cu sali pa respeta democracia mes, y pa nos esaki ta un honor. Nos ta haci esaki cu hopi placer y nos ta cla pa asumi responsabilidad” Ursell Arends a expresa.
El a subraya cu respeta democracia ta nifica respeta e resultado di eleccion. Aworaki, tin tres partido grandi, esun mas grandi ta esun yama pa forma gobierno y si esaki no por e di dos partido mas grandi lo wordo yama pa forma e gobierno. RAIZ como e di tres partido mas grandi, lo wordo yama pa tin un rol y vez cu esaki sosode, RAIZ ta cla pa asumi su responsabilidad, sea pa duna contenido como gobierno of den parlamento, e lider di partido RAIZ a reitera.
