Parlamentario Gino Goeloe:
ORANJESTAD (AAN) Parlamentario Gino Goeloe, fraccion di Futuro, a declara den entrevista cu DIARIO, cu pa Presupuesto 2026 ya caba a aloca placa pa Fundacion SABA y tambe pa Wit Gele Kruis, y algun instancia cu ta duna cuido na nos grandinan, manera esnan di pasadia. “Nan ta haya mas placa p’asina mas pasadia habri aki na Aruba.
Pero e problema t’asina grandi aki na Aruba, cu actualmente nos mester haci’e di manera gradual. Pues, gradualmente SABA ta bay haya su placa, Wit Gele Kruis, y tur e instancianan cu ta cuida nos grandinan. Asina 2027, 2028 y asina ey, te ora nos yega unda nos mester ta. E problema aki ta data di hopi aña caba, pero aworaki e problema ta wordo resolvi poco, poco”, e parlamentario a señala.
Goeloe a sigui bisa cu e prognosis ta cu nan sa unda nan ta bay y cu Directie Ouderenzaken ta sintando conhuntamente cu tur e partnernan cu ta traha cu nos grandinan, manera pasadianan, fundacion, Fundacion Alzheimer, Wit Gele Kruis, SABA, Cas Marie. “Y asina tin hopi instancia cu ta traha cu nos grandinan y tambe tin e casnan priva pa wak na unda nos por reforza, pasobra e problema aki ta, conhuntamente, colectivamente, nos por resolv’e. No cada instancia ta bay riba su mes, pero nos tin cu resolve e problema aki colectivamente”, e parlamentario a bisa y a reitera cu hunto mester yega unda nan mester ta.
El a señala cu e directora di Directie Ouderenzaken, señora Desiree Helder, ta haciendo un tremendo trabao y e ta sintando cu tur e instancianan menciona, pa haci un plan y un maneho loke tin caba, pero solamente e placa mester aloca pa e instancianan cuminza funciona.
