Parlamentario Evelyn Wever-Croes
ORANJESTAD (AAN): Siman pasa, durante e ultimo reunion publico den Parlamento, Parlamentario di Fraccion di MEP, Evelyn Wever-Croes a enfatisa cu nos hobennan mester haya miho posibilidadnan. Especialmente, pa nan por haya bon trabou despues cu nan termina nan estudio. Y esaki ta un di e 3 areanan di preocupacion di nos hobennan cu Fraccion di MEP a identifica.
Segun e Parlamentario a sugeri den su disertacion, un preocupacion di nos hobennan ta e hecho cu e gobierno aki, AVP-Futuro, tin un maneho di personal rond di e ministernan di persononan cu tin reputacion hopi dudoso, cu antecedentenan penal hopi serio.
Esaki, segun Parlamentario Wever-Croes, ta duna e hobennan aki un sentimento di insiguridad. E parlamentario a remarca cu el a puntra gobierno riba e maneho di personal, si ainda esnan cu ta traha cu gobierno mester tin un declaracion di bon conducta remarcando, cu si esaki ta e caso, hopi persona cu ta den personal di e gobierno aki, no por ta trahando cu nan.
Fraccion di MEP ta spera cu Gobernio di AVP-Futuro lo inverti e extra surplus den nos hobennan y duna nan e speransa pa nan tambe por duna di nan parti pa traha pa nos pais.
