Parlamentario Eduard Pieters di Fraccion di PPA:
ORANJESTAD (AAN): Segun Parlamentario di PPA, señor Eduard Pieters a declara den un entrevista recien, PPA semper a boga y a sali na defensa pa tur hende muhe den nos comunidad y a mustra esaki cu hechonan. El a menciona cu den un reunion publico den Parlamento den pasado, PPA tabata e unico partido cu a bin cu un mocion pa structuralmente implementa un intermediacion y intervencion pa mitiga violencia relacional, violencia contra hende muhe y mucha muhe.
E intencion di e motion aki di partido PPA ta pa asina por cuminsa dal pasonan grandi y firme pa ratifica e Tratado di Istanbul. “Violencia, sea na cas of riba caya, tin un impacto enorme riba muchanan. Como docente y pedagogo, mi mester bringa pa esnan mas vulnerabel. Y PPA ta caracterisa pa hiba e lucha pa esnan cu kisas a perde nan bos of no tin mucho bos”, e parlamentario a expresa.
Segun Pieters a remarca, cu ora cu a busca sosten den Parlamento pa e mocion aki, e parlamentarionan cu ta sostene e gobierno di coalicion, siendo mayoria, a vota contra e mocion aki. Mientras si a haya sosten di Fraccion di MEP.
“Esaki ta hopi lamentable pasobra den coalicion tin varios hende muhe. Y una bes cu nan mester a para firme pa e motion aki cu ta algo bon, sin importa cu el a bin di oposicion, nan a hunga politica y a vota contra e bos di e hendenan muhe”, Parlamentario Pieters a agrega.
El a sigui bisa cu a perde un bataya, sinembargo no a perde e guera. E lucha ta sigui. PPA ta hibando combersacionnan cu tur e instancianan cu ta traha pa sali na vanguardia di e mucha muhe y hende muhe, pa asina duna contenido na e derechonan di hende muhe.
Su mensahe pa pueblo y pa tur hende muhe, den nomber di Fraccion y di Partido PPA, den conexion cu Dia di Hende Muhe dia 8 di maart venidero: “Hende muhe ta e columna vertebral di un famia. Pero, ta tur dia ta dia di hende muhe y nos mester duna respet na cada hende muhe, na e sernan cu a duna nos bida. Cada hende muhe mester respeta nan mes tambe pa asina nan ta un ehempel pa nos comunidad. Fraccion di PPA ta felicita tur hende muhe riba nan dia”.
