Parlamentario Clifford Heyliger:
ORANJESTAD (AAN)- Parlamentario Clifford Heyliger, di fraccion di AVP, a duna un par di detaye mas tocante e reunion di Parlatino, cu a tuma lugar na Aruba na September ultimo.
Den su entrevista cu DIARIO el a menciona cu e Comision di Agricultura, Cria y Pesca a reuni cu Minister di Finanzas y Economia Geoffrey Wever, ken a host e grupo y a presenta su proyecto di Agrifarm, y e bishitantenan tabata hopi interesa den dje. Djeynan a bin combersacionnan cu paisnan di Latinoamerica, manera esnan di Uruguay cu a expresa nan interes den haci negociacionnan comercial cu Aruba.
Aki por wak cu esaki tin su efecto economico, pero di parti di Parlatino, nan a papia riba e tema di pesca, por ehemplo un manera di piscamento cu ta afecta e medio ambiente. Heyliger a señala cu no tur caminda tin e mesun leynan, no tur caminda tin practicanan di pesca prohibi. Nan a sugeri pa bin cu un kader ley unda cada pais por haci uso di dje, adapte na su situacion.
Eynan nan a comparti informacion, yudando un cu otro, por ta un ta mas adelanta den trahamento di ley, of aplicacion di cierto leynan, anto e otronan por siña of intercambia riba temanan asina.
E parlamentario a bisa cu e presidente actual di Parlamento, señor Marlon Sneek ta haciendo un trabao pa wak con Aruba por conecta miho, con por facilita pa mehoracion.
“Como Parlamento, nos ta haciendo nos trabao pa siña den e parti di Legislacion pero tambe den interaccion, bo por sa ki necesidad bo tin, of bo ta haya sa e necesidad di un pais anto e ora ey, nos ta conecta e organizacionnan cu lo beneficia di dje, of cu por conecta gobierno.
Parlamento tog ta hungando un rol hopi mas importante den e region y den conexionnan economico na bienestar di e pueblo”, Parlamentario Clifford Heyliger a señala.
