Segun Parlamentario Tevreden di MEP:
ORANJESTAD (AAN) – Parlamentario Hendrick Tevreden, di fraccion di MEP, a expresa den conferencia di prensa, cu e ta lamenta cu un delegacion di Parlamento a participa den e reunionnan di IPKO, na Sint Maarten, y despues bin bek busca ganashi politico, mientras cu esaki ta e momento pa nan uni como pais, y pa tur nanishi ta den mesun direccion.
E ta lamenta esaki pasobra e temponan nos dilanti ta serio cu, como pais, como Isla, como gobierno, parlamento, sindicato, gremionan, mester ta uni cu e bista fiha den un direccion pa Aruba por logra e meta.
El a menciona cu na salida di e Tripartite, Aruba a logra e punto aki, y tabata prome biaha cu den un Tripartite tabata tin consenso. “Y nos tur a bisa den e Tripartite, esta Sint Maarten, Curacao y Aruba, cu nos ta contra e forma con e leynan aki (COHO-RAft), a wordo presenta y ehecuta.
Esey ta un consenso cu nos a para riba dje, pero lamentablemente na final, ora di cera e ‘afspraakenlijst’, a bin un distanciamento, unda cu atrobe nos a haya cu a duna e Hulandesnan e espacio pa por dividi y konkel”, Tevreden a comenta.
El a agrega cu diamars, den e conferencia di prensa, e division aki a bolbe presenta. El a nota cu Parlamentario Mansur, di partido Accion 21, ainda no ta compronde bon di tur e informacionnan cu a wordo duna na IPKO, apesar cu e tabata hopi laat presente, unda cu Sint Statius a bin splica kico ta nan posicion, despues di a haya nan mes den 10-10-10. “Nan a splica nos con nan ta wordo trata pa gobierno Hulandes, despues di 10-10-10.
Nos sa tambe e situacion di Bonaire, despues di 10-10-10 unda instancianan manera ‘Nos kier Bonaire bek’ bringando pa nos por haya Bonaire, manera cu e tabata antes. Pues, señor Mansur den su splicacion ta duna mi di compronde, cu e kier hiba Aruba den un sistema di Provincia of 'Gemeente', contrario na loke nos a palabra den reunion publico y nos a bisa cu nos no kier esey pa Aruba”, Tevreden a señala.
E parlamentario a referi na Parlamentario Mansur, bisando e cu por fabor bay bek nan Sint Statius, bay bek na Bonaire, y mira e situacion actual, pa por fabor bin den e linea hunto cu nos, manera cu nos a palabra den Eerste y Tweede Kamer Hulandes, pa nos por cambia ainda mas, e leynan cu ta wordo presenta.
