Vragenuur riba seguridad di trafico den Parlamento
ORANJESTAD (AAN): Den ultimo dia y simannan tra’i lomba, pueblo di Aruba a keda profundamente conmovi y den shock como consecuencia di varios accidente di trafico cu a tuma lugar riba nos careteranan, cu resultado tragico y, lamentablemente, fatal. E aumento di e incidentenan aki, hunto cu e incertidumbre y preocupacion cu nan a crea den nos comunidad, ta exigi reflexion y accion responsabel.
Parlamentario John Hart, den su capacidad como presidente di e Comision di Husticia den Parlamento di Aruba, kier anuncia cu el a solicita Minister di Husticia, drs. Arthur Dowers, pa un vragenuur pa bin duna contesta na preguntanan den un reunion di comision enfoca riba e tematica di siguridad den trafico.
E reunion aki lo tin como proposito principal evalua e situacion actual, analisa e patronnan di accidente y considera medidanan concreto pa fortalece e control riba trafico.
Entre e temanan cu lo trata ta: (*) E importancia di conducta responsabel di chauffeurnan, e aplicacion di control mas severo, y e estado y diseño di infrastructura di nos careteranan, cu e fin di preveni accidentenan cu consecuencia grave y fatal.
Ademas, parlamentario Hart kier sa si e pena y sentencianan actual ta suficiente severo pa kita hende di bay tra’i stuur bou di influencia di alcohol, y si un posible aumento den e castigonan por contribui na preveni mas accidente y scapa bida.
“Nos no por keda man crusa,” asina Parlamentario Hart a enfatisa. “Parlamento tin un responsabilidad cla pa asumi su rol y, hunto cu gobierno y su departamentonan competente - entre nan Minister di Husticia - wak kico ta e accion y medidanan cu mester tuma pa garantisa mas siguridad pa tur hende riba nos camindanan.”
E parlamentario di AVP ta convenci cu siguridad den trafico ta un responsabilidad comparti, unda concientisacion, prevencion, control y infrastructura mester traha hunto. Parlamento lo sigui e tema di cerca y lo contribui activamente na buskeda di solucionnan sostenibel pa proteha bida humano y mantene e bienestar di nos sociedad.
