ORANJESTAD (AAN): Parlamentario Edgard Vrolijk di MEP, ta corda con Partido Futuro a priminti den campaña di hiba un politica di transparencia pero
sigur den nan programa a haci e promesa na pueblo cu lo reenforsa Parlamento y unda enfoke lo ta pa respeta nos constitucion. Awe nos ta wak cu Futuro ta haci net lo contrario unda ta actua contra constitucion, viola reglanan di bon gobernacion, no tin transparencia y ta hiba un politica di cabernicola di insulta, gaña y atakenan personal. Sigur siman pasa durante tratamento den comision central a trapa nos constitucion.
Loke a socede: Tabata dia 19 di November 2025 a trata den comision central e ley conoci como LIM (landsverodening instelling ministers). Un ley importante cu a haya un dictum 4 cu ta un onvoldoende. Den e reunion aki ta costumber cu ta bin hunto y ta fiha fecha pa haci pregunta cu despues ta ser hinca den un documento cu nos ta yama verslag (un compilacion di preguntanan) y cu mester bin sala back den un CC pa leg esakinan vast y pa despues nan bay pa Gobierno pa nan contesta e preguntanan.
E derecho di haci pregunta ta ancra den nos Constitucion y nos Reglamento di Ordo di Parlamento. Na e momento ey sra Muzanin Wever tabata fungi como Presidente den ausencia di sr Marlon Sneek. Su persona a bin c’un proposicion pa haci e verslag blanco, pues pa no haci uzo di bo derecho di haci pregunta. Esaki ta un desviacion y conforme articulo 83 inciso 3 di Reglamento di Ordo tur miembro mester ta di acuerdo.
Pues si un miembro no ta di acuerdo, mester fiha fecha pa entrega di pregunta. Den e caso aki sra Muzanin Wever a dicidi di trapa Constitucion y no sigui Reglamento di Ordo di Parlamento y ta conclui cu e decision pa haci’e blanco por bay cu mayoria esta fraccion di AVP-Futuro y PPA. Esaki no ta cuadra cu e berdad! E decision tuma tabata uno contra Reglamento di Ordo y ta trapa derecho constitucional di cada Parlamentario pa haci pregunta.
Di dos blunder: Ora cu fraccion di MEP a protesta y a manda carta pa Gobernador Boekhoudt, su mañan un reunion di comision central a ser yama pa fiha fecha pa por haci pregunta. Sra Muzaninn Wever a ser ranca na orea cu el a comete un eror y mester yama e reunion di nobo y a bise cu e no por kita derecho individual di un parlamentario pa haci pregunta c’un mayoria.
Enbes di admiti su eror, el a dicidi di uza su arogancia y su malicia politico pa bin lesa for di un documento cu nan a skirbi p’e. Den esaki el a lesa un bunita versje unda e no ta admiti cu la actua incorecto y supuestamente el a busca conseho legal cu te dia di awe ta spirito. Nos a pidi Señora Muzaninn mustra nos e advies legal aki y diripiente e no tabata tin’e mas.
Pero e mas insolito ta c’un biaha mas e ta bira actua contra constitucion. Dus e prome biaha no tabata suficiente, el a bolbe haci’e e di dos biaha. Asina Sra Muzaninn Wever riba su mes ta dicidi di duna menos di 12 ora na Parlamentarionan pa nan por entrega pregunta y ta sera e reunion sin duna espacio pa debate of expresa opinion.
Pues ni AVP, Futuro, PPA of MEP por a bisa algo. El a habri reunion, lesa su versje, duna tur hende 24 ora pa lesa y haci pregunta y bati martiu lanta bay. Nos Constitucion ta papia bon cla cu decision den Parlamento ta ser tuma cu mayoria. Sra Muzaninn Wever como Presidente den Parlamento no por tuma ningun decision riba su mes. Pues un biaha mas sra Muzaninn Wever ta actua contra constitucion y no ta realisa esaki. Ta lamentable tambe cu esun riba cabes di Parlamento cu mester percura pa cumpli cu Constitucion tambe ta hunga di ciego y no ta percura pa rectifica e grave eror cometi.
Ta di lamenta c’un partido cu a promete shelo y tera den campaña cu ta FUTURO y awo ta actua mescos cu AVP su actuacionan bieu di 2009-2017 cu a conduci na un disaster den gobernacion di pais Aruba. Na otro parti den Reino lo a exigi retiro di Muzaninn Wever de inmediatio pa e abuso di poder y actuacion contra nos Constitucion y reglamento di Ordo intencionalmente!
Pa termina ta lamenta cu ta trapa Constitucion, ta ignora Reglamento di Ordo pa sigui e agenda di Gobierno. Un ley asina importante manera un LIM cu conseho tabate negativo unda ta papia di kibra nos Constitucion y sigur un cantidadd di conseho preocupante, Futuro, AVP, PPA no kier haci ni un pregunta. Pregunta pabo ta: Di con tanto falta di transparencia asina cu pueblo? Kico tin tras di esaki?
