Ta keda atento pa accion contra abuso di prijs y taxi pirata
ORANJESTAD (AAN): Parlamentario Carlos Bermudez di AVP, e siman aki a expresa su satisfaccion cu e publicacion di e lista di prijs nobo pa sector di taxi, despues cu anteriormente el a hiba e asunto aki na atencion publico, cuestionando e tardanza den e proceso y presentando preguntanan por escrito na Minister di Transporte encarga cu taxi, mr. drs. Arthur Dowers.
Segun Bermudez, e actualisacion di e tarifanan ta representa un paso importante pa un sector cu pa largo tempo tabata sperando pa un revision. E ultimo ahuste oficial di e tarifanan di taxi a tuma luga na aña 2018, loke a crea un situacion caminda hopi taxistanan a perde confianza cu un lista di prijs nobo ainda tabata posibel den corto plazo.
“Mi ta compronde completamente e preocupacionnan cu e taxistanan a biba durante e ultimo añanan. Despues di ocho aña sin actualisacion, ta natural cu hopi persona a pensa cu e proceso lo sigui tuma demasiado tempo,” Bermudez a declara.
E parlamentario a reconoce cu, den su opinion, e proceso por a dura mas cu deseabel, pero a enfatisa cu e tambe ta consciente cu revisa y implementa un sistema tarifario nobo no ta un tarea facil. Segun Bermudez, Gabinete AVP-Futuro a hereda hopi reto acumula despues di añanan den cual diferente asunto importante no a ricibi e atencion necesario.
Mientras cu e ta felicita Ministro Dowers, su ekipo di trabao y tur taxista cu a contribui na logra e resultado aki, Bermudez ta considera cu ainda tin trabao pa haci pa fortalece e sector di transporte y aumenta confianza di publico.
Den e contexto ey, e ta haci un yamada serio na tur taxista pa contribui activamente na eliminacion di e fenomeno di abuso di prijs. Segun Bermudez, un paso practico y inmediato ta pa informa cada pasahero tocante e existencia di e plataforma oficial (www.Taxi.aw), caminda usuario por consulta e tarifanan oficial y calcula e costo di un traslado.
“E app y website oficial ta un paso importante den direccion di mas transparencia pa cliente y conductor. Sin embargo, nos no a yega na e meta ainda. Ainda tin diferente aspecto cu mester atencion adicional,” el a indica.
Entre e preocupacionnan cu ainda mester wordo atendi, Bermudez a menciona e problema persistente di asina yama “taxi pirata”, un fenomeno cu, segun e, ta afecta tanto e conductornan legalmente autorisa como e confianza den e sector.
“Tur hende tin derecho di gana nan pan, pero nos ta biba den un pais caminda respet pa ley y reglamentonan mester ta e base di nos convivencia y actividad economico,” Bermudez a señala.
E parlamentario a conclui door di expresa su gratitud na Minister Dowers pa e apertura y disposicion pa scucha tanto e preocupacionnan di e taxistanan como e puntonan presenta pa su persona.
E ta felicita un biaha mas e sector di taxi y e ministerio pa e logro alcanza y a confirma cu tambe e sectornan cu permiso di transporte turistico (T/O) y autobus tambe lo ricibi e atencion cu nan merece.
“Ban sigui pone ordo den sector di transporte, proteha esnan cu ta sigui ley y tuma accion firme contra ilegalidad y abuso. Asina nos ta crea un sistema mas husto, confiabel y profesional pa conductor y pasahero pareu,” Bermudez a conclui.
